غزہ، 14 اگست (یو این آئی) اسرائیلی فوج نے شمالی غزہ میں حملے بڑھا دیے ، دیگر علاقوں پر بھی بمباری کی جس کے نتیجے میں مزید 90 سے زائد فلسطینی شہید ہوگئے ۔غزہ کی وزارت صحت کے مطابق چہارشنبہ کو اسرائیلی فوج کی جانب سے شمالی غزہ میں حملے کیے گئے جبکہ دیگر علاقوں پر بھی بمباری سے اب تک مزید 90 سے زائد فلسطینی شہید ہوئے ۔امداد لینے کے لیے جمع 37 فلسطینی بھی شہدا میں شامل ہیں۔غزہ میں قحط کی صورتحال بھی برقرار ہے جہاں بھوک کی شدت سے مزید 8 فلسطینی انتقال کر گئے ،اسرائیل کی مسلط کردہ بھوک سے اموات کی تعداد 235 ہوگئی ہے ۔دوسری جانب یورپی ممالک نے غزہ میں بڑھتے قحط پر تشویش کا اظہار کرتے ہوئے اسرائیل سے امداد کی محفوظ فراہمی یقینی بنانے پر زور دیا۔نیوزی لینڈ نے غزہ امداد میں رکاوٹ اور فلسطینیوں کی جبری بے دخلی شرم ناک قرار دے دی۔
اسرائیلی صحافیوں کا تل ابیب میں احتجاجی مظاہرہ
تل ابیب، 14 اگست (یو این آئی) اسرائیلی صحافیوں نے غزہ کے صحافیوں سے اظہار یکجہتی کیلئے تل ابیب میں احتجاجی مظاہرہ کیا۔غزہ میں صحافیوں کے قتل کے خلاف اسرائیلی صحافی مظاہرین کا کہنا تھا کہ سچ دفنانے کے لیے صحافیوں کو دفن کیا جا رہا ہے ۔انہوں نے ‘غزہ کے صحافیوں سے اظہار یکجہتی’ کی تحریر والے پلے کارڈز اٹھا رکھے تھے ۔اسرائیلی صحافیوں نے نیتن یاہو حکومت سے غزہ کے صحافیوں کا قتل عام روکنے کا مطالبہ کیا۔واضح رہے کہ اسرائیلی فوج نے اتوار کو غزہ میں صحافیوں کے کیمپ پر بمباری میں خلیجی چینل کے صحافیوں سمیت غزہ کے چھ صحافیوں کو قتل کیا تھا۔اسرائیلی فوج 7 اکتوبر 2023 سے اب تک غزہ میں 200 سے زائد صحافیوں کو قتل کر چکی ہے ۔