غزہ : فلسطینی میڈیا کا کہنا ہے کہ اسرائیلی فوج کا کمال عدوان اسپتال پر حملہ فلسطینیوں کو شمالی غزہ سے نکالنے کی مایوس کوشش ہے۔فلسطینی میڈیا کے مطابق اسرائیل کی شمالی غزہ سے شہریوں کو بے دخل کرنے کی کوشش کئی بار ناکام رہی۔فلسطینی میڈیا نے بتایا کہ طبی عملے سمیت متعدد افراد کو حراست میں لے کر کہیں اور منتقل کردیا گیا، اسپتال پر حملے سے پہلے یہاں کئی دنوں تک گولہ باری کی گئی اور محاصرہ کیا گیا۔میڈیا رپورٹس میں بتایا گیا کہ اسپتال میں داخل مریضوں کو پانی، خوراک اور طبی سامان کی فراہمی روک دی گئی، اسرائیلی اقدامات بین الاقوامی اور انسانی قانون کے تحت جرم ہیں۔فلسطینی میڈیا نے کہا کہ اسرائیل کے غیر انسانی عمل کو امریکی انتظامیہ کی مکمل حمایت حاصل ہے، انسانیت کے خلاف اسرائیلی جرائم کو روکنا عالمی برادری کی ذمہ داری ہے۔
شمالی غزہ میں مزید 8 اسرائیلی فوجی ہلاک
شمالی غزہ میں جھڑپوں میں 24 گھنٹوں کے دوران اسرائیل کے مزید 8 فوجی ہلاک ہو گئے۔اسرائیلی فوج کے مطابق ہلاک فوجیوں میں لیفٹیننٹ کرنل، میجر اور کیپٹن بھی شامل ہیں۔اسرائیلی فوج کے مطابق غزہ میں جھڑپوں میں مرنے والے اسرائیلی فوجیوں کی تعداد 105 ہو گئی ہے۔دوسری جانب اسرائیل نے بحیرہ? احمر میں 4 جنگی جہاز بھی بھیج دیے ہیں۔عرب میڈیا کے مطابق حوثی باغیوں کی دھمکی کے بعد اسرائیلی جہاز بحیرہ احمر میں تعینات کیے جائیں گے۔
