واشنگٹن : امریکہ میں فلسطینیوں کے حقوق کی حمایت اور فلسطینیوں سے یکجہتی کامظاہرہ کیاگیا۔ خبررساں اداروں کے مطابق مظاہرین نے رتھیون نامی کمپنی کے سامنے احتجاج کرتے ہوئے اندر جانے کے راستے بند کردیے۔ یہ کمپنی اسرائیل کیلئے گائیڈڈ میزائل اورآئرن ڈوم تیار کرتی ہے۔ مظاہرین کا کہنا تھا کہ یہ اسلحہ فلسطینیوں کو مارنے ، ان کی زمینوں پر قبضہ کرنے اور اسرائیلی نسل پرست حکومت کے دفاع کے لیے استعمال کیا جاتاہے۔ مظاہرین نے کمپنی کے ملازمین کی حاضری کے وقت داخلی راستے پر جمع ہوکر5گھنٹے تک داخلی راستہ بند رکھا۔ مظاہرہ کرنے والے 2مظاہرین نے خود کو گاڑیوں سے باندھ دیا اور راستہ روکے رکھا۔ بعد میں پولیس نے کارروائی کرتے ہوئے راستہ کھولا اور کئی مظاہرین کو گرفتار کرلیا۔ دوسری جانب امریکہ کی 17تنظیموں نے فلوریڈا کے ٹمپا اسپتال اور اسرائیلی کمپنیوں کے درمیان طے پانے والے شراکت داری کے معاہدے کی مذمت کی ہے۔ اس سلسلے میں تنظیموں نے مختلف سرگرمیاں شروع کی ہیں ، جن میں ا?ن لائن مظاہرے ، مہمات شامل ہیں۔ اس کے علاوہ ایک پٹیشن میں طبی کارکنان ، طلبہ اور دیگر تنظیموں کے ارکان نے فلسطینیوں پر اسرائیلی جارحیت کی مذمت کی ہے۔
