غزہ : اسرائیل کی جانب سے جنگ بندی کی خلاف ورزی کرتے ہوئے مسلسل آٹھویں روز بھی غزہ پر بمباری کا سلسلہ جاری رہا، جس کے نتیجے میں 7 بچوں سمیت کم از کم 23 فلسطینی شہید ہوگئے، غزہ میں اسرائیلی حملے میں الجزیرہ کے صحافی حسام شباط بھی شہید ہونے والوں میں شامل ہیں۔الجزیرہ کے مطابق اسرائیلی فورسز نے ایک ہفتے میں دوسری بار پالمیرا شہر کے قریب 2 شامی فضائی اڈوں پر بھی بمباری کی ہے۔اسرائیل کی جانب سے غزہ میں الجزیرہ کے رپورٹر حسام شباط کو ٹارگٹ کرنے اور مقبوضہ مغربی کنارے میں آسکر ایوارڈ یافتہ فلم ساز حمدان بلال کی گرفتاری پر غم و غصے میں اضافہ ہوا ہے۔غزہ کی وزارت صحت کا کہنا ہے کہ غزہ پر اسرائیلی جنگ میں کم از کم 50 ہزار 82 فلسطینی شہید جبکہ ایک لاکھ 13 ہزار 408 زخمی ہوئے ہیں۔خاص طور پر شجاعیہ اور الزیتون کے علاقوں میں صورتحال مزید خراب ہو رہی ہے، اسرائیلی افواج وہاں گھروں پر حملے کر رہی ہیں۔جبالیہ میں آدھی رات کو انخلا کے احکام بھی جاری کیے گئے، جہاں فلسطینیوں کو اندھیرے کے دوران آگ کی زد میں رہنے پر مجبور کیا گیا۔ ادھر دیر البلاح میں اسرائیلی فورسز نے 2 خاندانوں کے گھروں کو نشانہ بنایا، F-16اور اپاچی ہیلی کاپٹروں کی آواز انتہائی بلند تھی، اور فلسطینی بچوں کیلئے صدمے کا باعث بن رہی تھی۔وسطی غزہ کے بریج کیمپ میں ایک حملے میں ایک ہی خاندان کے 8 فلسطینی شہری شہید ہوگئے، حملے سے لگنے والی آگ کئی گھنٹوں تک جلتی رہی، وسطی علاقے میں شہید ہونے والوں میں زیادہ تر خواتین اور بچے شامل ہیں۔یہ سب کچھ اس وقت ہو رہا ہے، جب اسرائیلی افواج اہم زمینی گزرگاہوں کو بند کرنے کا سلسلہ جاری رکھے ہوئے ہیں۔غزہ میں اب بھی کھانے پینے کی قلت ہے، ایندھن نہیں ہے، طبی سامان نہیں ہے اور کھانا پکانے کیلئے گیس بھی نہیں دی جا رہی۔
غزہ میں 208 صحافی شہید
غزہ : فلسطینی حکام کے مطابق 7 اکتوبر 2023 سے اب تک اسرائیلی حملوں میں کم از کم 208 صحافی شہید ہوچکے ہیں، ان میں الجزیرہ کے 7 صحافی بھی شامل ہیں۔الجزیرہ کے شہید ہونے والے صحافیوں میں 24 مارچ 2025 کو الجزیرہ مبشر کے صحافی حسام شباط شمالی غزہ میں اسرائیلی فضائی حملے میں شہید ہوئے۔ 31 جولائی 2024 کو الجزیرہ کے صحافی اسمٰعیل الغول اور رامی الرفی غزہ شہر کے مغرب میں واقع شتی پناہ گزین کیمپ میں رپورٹنگ کے دوران شہید ہوئے، 15 دسمبر 2024 کو اسرائیلی فوج نے وسطی غزہ کی پٹی میں نصیرات کیمپ کے بازار میں فلسطینی شہری دفاع کی چوکی پر فضائی حملے میں فوٹو جرنلسٹ احمد بکر اللوح کو شہید کیا۔7 جنوری 2024 کو صحافی اور الجزیرہ کے غزہ بیورو چیف وائل دہدوح کے سب سے بڑے بیٹے حمزہ دہدوح غزہ کے علاقے خان یونس کے مغربی حصے میں اسرائیلی حملے میں شہید ہوئے تھے۔14 دسمبر 2023 کو الجزیرہ کے صحافی سمیر ابوداقہ کو خان یونس کے فرحانہ اسکول میں رپورٹنگ کے دوران شہید کر دیا گیا تھا، سمیر ابوداقہ کے ساتھ موجود وائل دہدوح زخمی ہو گئے تھے۔