سعودی عرب، قطر، ایران کی جانب سے شدید مذمت ۔ حماس کااسرائیلی جنرل نمرود کو یرغمال بنا نے کا دعویٰ
یروشلم : حماس کے حملوں کے جواب میں اسرائیل نے غزہ کی پٹی میں 17 ملٹری کمپاؤنڈز اور 4 ملٹری ہیڈ کوارٹرز پر حملہ کرنے کا دعویٰ کیا ہے۔ اس میں اب تک 198 فلسطینی جاں بحق ہو چکے ہیں جبکہ 1600 سے زائد زخمی ہیں۔ الجزیرہ کے مطابق 1000 سے زائد فلسطینی اسرائیل میں داخل ہو چکے ہیں۔ ایسا 1948 کے بعد پہلی بار ہوا ہے۔ اس کے ساتھ ہی حماس کی جانب سے صبح داغے گئے 5 ہزار راکٹوں کی وجہ سے اب تک 40 اسرائیلی ہلاک اور 750 زخمی ہو چکے ہیں۔ غزہ کی پٹی سے حملے کے بعد اسرائیلی وزیراعظم بنجمن نیتن یاہو نے اعلان جنگ کر دیا تھا۔ کابینہ کے ساتھ ہنگامی اجلاس کے بعد انہوں نے کہا تھا- یہ جنگ ہے اور ہم اسے ضرور جیتیں گے۔ دشمنوں کو اس کی قیمت چکانی پڑے گی۔ ساتھ ہی حماس نے دعویٰ کیا ہے کہ انہوں نے کئی لوگوں کے ساتھ اسرائیلی جنرل نمرود علونی کو بھی یرغمال بنایا ہے۔ یرغمالیوں کی تعداد اتنی ہے کہ ان کے بدلے وہ اسرائیلی جیلوں میں قید تمام فلسطینیوں کو رہا کر سکتے ہیں۔ انہیں بچانے کیلئے اسرائیلی فورسز نے اوفاکیم کے علاقے میں ایک گھر کو گھیرے میں لے لیا ہے۔ یہاں وہ حماس کے جنگجوؤں سے بات کر رہے ہیں۔ دوسری جانب اسرائیل میں بگڑتی ہوئی صورتحال کے درمیان ہندوستانی سفارت خانے نے وہاں موجود اپنے شہریوں کیلئے ایڈوائزری جاری کی ہے۔ انہیں الرٹ اور محفوظ رہنے کو کہا گیا ہے۔ وزیر اعظم مودی نے کہا ہے کہ مشکل وقت میں ہندوستان اسرائیل کے لوگوں کے ساتھ ہے۔ حماس نے اسرائیل کے خلاف اپنے آپریشن کو ‘الاقصیٰ سیلاب’ کا نام دیا ہے۔ اس کے ساتھ ہی اسرائیلی فوج نے حماس کے خلاف فولادکی تلواریں آپریشن شروع کر دیا ہییروشلم پوسٹ کے مطابق حماس کے جنگجوؤں نے کئی اسرائیلی قصبوں پر قبضہ کر لیا ہے۔ حماس کے فوجی کمانڈر محمد دیف نے کہا کہ یہ حملہ اسرائیل کی طرف سے یروشلم میں مسجد الاقصی کی بے حرمتی کا بدلہ ہے۔ فوج حماس کے ٹھکانوں پر حملے کر رہی ہے۔ دراصل اسرائیلی پولیس نے اپریل 2023 میں مسجد اقصیٰ پر گرینیڈ پھینکا تھا۔ جبکہ حماس کے ترجمان غازی حماد نے الجزیرہ کو بتایا کہ یہ کارروائی ان عرب ممالک کیلئے ہمارا جواب ہے جو اسرائیل کے قریب ہو رہے ہیں۔ حالیہ دنوں میں میڈیا رپورٹس میں دعویٰ کیا گیا تھا کہ سعودی عرب امریکہ کے اقدام پر اسرائیل کو ایک ملک کے طور پر تسلیم کر سکتا ہے۔ سعودی عرب، قطر، ایران کا کہنا ہے کہ حماس کے حملوں کا ذمہ دار صرف اسرائیل ہے۔ سعودی عرب، قطر اور ایران کی حکومتیں ہفتہ کے روز اسرائیل کے ساتھ بڑھتے ہوئے تنازعہ میں حماس کی حمایت کرتی نظر آئیں۔فلسطینی عسکریت پسند گروپ نے ہفتے کی صبح اسرائیلی فورسز اور بستیوں پر بڑے پیمانے پر حملہ کیا جس میں کم از کم 40 افراد ہلاک ہو گئے۔ جہاں امریکہ اور یورپ کے رہنماؤں نے فوری طور پر اس حملے کی مذمت کی اور اسرائیل کی حمایت کی، وہیں مشرق وسطیٰ کے تین ممالک نے فلسطینیوں کے ساتھ برتاؤ پر ملک پر تنقید کی۔ مملکت کی وزارت خارجہ نے ایک بیان میں کہا کہ سعودی عرب کئی فلسطینی دھڑوں اور اسرائیلی قابض افواج کے درمیان غیر معمولی صورتحال کی پیش رفت کا قریب سے مشاہدہ کر رہا ہے، جس کے نتیجے میں وہاں کئی محاذوں پر تشدد میں اضافہ ہوا ہے۔
بیان جاری ہے کہ مملکت مسلسل قبضے، فلسطینی عوام کو ان کے جائز حقوق سے محروم کرنے، اور اس کے مقدسات کے خلاف منظم اشتعال انگیزیوں کے اعادہ کے نتیجے میں صورت حال کے پھٹنے کے خطرات کے بار بار انتباہات کو یاد کرتی ہے۔ یہ مذمت اس وقت سامنے آئی ہے جب اسرائیل اور سعودی حکومتوں نے حالیہ برسوں میں امریکہ کی حوصلہ افزائی پر تعلقات کو معمول پر لانے کی کوشش کی ہے۔ ایرانی حکومت کے ایک سینئر مشیر نے واضح طور پر تنازعہ میں حماس کی حمایت کی جو عالمی سطح پر کسی بھی حکومتی اہلکار کی طرف سے عسکریت پسند گروپ کیلئے سب سے براہ راست حمایت ہے۔ رائٹرز کے ذریعہ سرکاری میڈیا کے مطابق، مشیر یحییٰ رحیم صفوی نے کہاکہ “ہم فلسطینی جنگجوؤں کو مبارکباد پیش کرتے ہیں۔ ’’ ہم فلسطین اور یروشلم کی آزادی تک فلسطینی جنگجوٰٰں کے ساتھ کھڑے رہیں گے۔ایران کے سرکاری میڈیا نے ہفتہ کے روز پارلیمنٹ کے ارکان کی حماس کی حمایت میں نعرے لگانے کی ویڈیو دکھائی، جس میں کہا گیا کہ مرگ بر اسرائیل اور فلسطین کی فتح ہے، اسرائیل تباہ ہو جائے گا۔ اسرائیل کے ساتھ کئی دہائیوں سے جاری تنازعہ کے ایک حصے کے طور پر ایران کئی سالوں سے حماس کو فنڈ اور سپلائی کرتا رہا ہے۔ قطری وزارت خارجہ نے بھی تشدد کا ذمہ دار اسرائیل کو ٹھہرایا۔ وزارت خارجہ فلسطینی عوام کے حقوق کی اس مسلسل خلاف ورزیوں کی وجہ سے موجودہ کشیدگی کا ذمہ دار تنہا اسرائیل کو ٹھہراتی ہے، جس میں تازہ ترین اسرائیلی پولیس کی حفاظت میں مسجد اقصیٰ پر بار بار چھاپے۔ اپریل میں یروشلم کی مسجد اقصیٰ میں تشدد پھوٹ پڑا تھا ، جو مسلمانوں کیلئے ایک مقدس مقام ہے۔ کئی دنوں کی لڑائی میں اسرائیلی پولیس نے مسجد پر چھاپہ مار کر درجنوں نمازیوں کو گرفتار کر لیا۔ اسرائیلی وزیر اعظم بنجامن نیتن یاہو نے ہفتے کی صبح ایک عوامی خطاب میں اس تنازع کو جنگ قرار دیا۔ امریکہ نے اسرائیل کی حمایت کرنے کا عزم ظاہر کیا ہے، وزیر دفاع لائیڈ آسٹن نے کہا کہ حکومت اس بات کو یقینی بنائے گی کہ ملک کے پاس اپنے دفاع کیلئے جو کچھ درکار ہے وہ موجود ہے۔