تل ابیب : 13اگست ( ایجنسیز ) اسرائیل جنوبی سوڈان کے ساتھ غزہ سے جنگ زدہ مشرقی افریقی ملک میں فلسطینیوں کی آبادکاری کے امکان کے بارے میں بات چیت کر رہا ہے ، جو اسرائیل کی جانب سے محصور علاقے کے خلاف 22 ماہ کی جنگ کی وجہ سے تباہ حال علاقے سے بڑے پیمانے پر نقل مکانی کو آسان بنانے کی وسیع تر کوشش کا حصہ ہے۔اس معاملے سے واقف چھ افراد نے ایسوسی ایٹڈ پریس کو بات چیت کی تصدیق کی۔اسرائیلی وزیر اعظم بنجامن نیتن یاہو نے کہا ہے کہ وہ امریکی صدر ڈونلڈ ٹرمپ کے غزہ کی زیادہ تر آبادی کو ‘رضاکارانہ نقل مکانی’ کے ذریعے منتقل کرنے کے وڑن کو عملی جامہ پہنانا چاہتے ہیں۔ اسرائیل نے دیگر افریقی ممالک کے ساتھ بھی اسی طرح کی بازآبادکاری کی تجاویز پیش کی ہیں۔فلسطینیوں، انسانی حقوق کی تنظیموں اور بین الاقوامی برادری نے ان تجاویز کو بین الاقوامی قوانین کی خلاف ورزی کرتے ہوئے جبری بے دخلی کا خاکہ قرار دے کر مسترد کر دیا ہے۔یہ ٹرمپ کے لیے بھی ایک ممکنہ قدم ہے، جنہوں نے فروری میں غزہ کی آبادی کو دوبارہ آباد کرنے کا خیال پیش کیا تھا لیکن ایسا لگتا ہے کہ وہ اب اپنی اس تجویز سے دستبردار ہو چکے ہیں۔اسرائیل کی وزارت خارجہ نے تبصرہ کرنے سے انکار کر دیا جبکہ جنوبی سوڈان کے وزیر خارجہ نے مذاکرات کے بارے میں سوالات کا جواب نہیں دیا۔امریکی امور خارجہ کے ایک ترجمان نے کہا کہ وہ نجی سفارتی بات چیت پر تبصرہ نہیں کرتے ہیں۔ واضح رہے کہ بہت سے فلسطینی جنگ اور قحط سے متصل بھوک کے بحران سے بچنے کے لئے کم از کم عارضی طور پر غزہ چھوڑنا چاہتے ہیں لیکن انہوں نے کسی بھی مستقل آبادکاری کو یکسر مسترد کر دیا ہے۔
صحافتی اصول اپنائیں
صحافی کو الجزیرہ کے ڈائرکٹر کی ہدایت
نیویارک : 13اگست ( ایجنسیز ) غزہ میں ہوئے اسرائیلی حملوں میں صحافیوں کی شہادت کے موضوع برطانوی میڈیا کو انٹرویو کے دوران ڈائریکٹر نیوز الجزیرہ نے اسرائیلی پروپیگنڈہ سے متعلق سوالات پر برطانوی صحافی کو الزامات سے پہلے صحافتی اصولوں پر عمل کرنے کی تلقین کی۔الجزیرہ کے صحافی انس الشریف اور ان کی ٹیم کے اسرائیل کے ہاتھوں ٹارگٹڈ قتل پر برطانوی نشریاتی ادارے بی بی سی نے الجزیرہ کے ڈائریکٹر نیوز صالح نجم سے بات کی۔بی بی سی ہوسٹ نے سوال ایسے کیے کہ الجزیرہ کے ڈائریکٹر نیوز صالح نجم کو برطانوی صحافی کو صحافت کی الف، ب سمجھانا پڑ گئی۔برطانوی صحافی بار بار انس الشریف کے بارے میں اسرائیل کے جھوٹے موقف پر سوال کرتا رہا جس پر صالح نجم نے بار بار یہی کہا کہ صحافی کا کام ہے تحقیق کے بعد خبر دینا، یکطرفہ خبر دینا غیر صحافتی عمل ہے۔واضح رہے کہ 11 اگست کو اسرائیل کی جانب سے غزہ سٹی میں صحافیوں کے خیمے پر بمباری کی گئی جس کے نتیجے میں الجزیرہ کے انس الشریف سمیت 2 صحافی اور 3 کیمرہ آپریٹر شہید ہوگئے تھے۔