نئی دہلی : سپریم کورٹ نے 80 سالہ اسرو سائنسدان نمبی نارائنن کو 1994 کے جاسوسی واقعہ میں پھنسانے کے ایک معاملے میں کچھ پولیس اور انٹیلی جنس افسران کو ضمانت دینے کے حکم کو کل مسترد کردیا۔ جسٹس ایم آر شاہ کی زیرقیادت بنچ نے کیرالا ہائیکورٹ کے عبوری ضمانت کے احکامات کو ایک طرف رکھ دیا جبکہ مرکزی تفتیشی بیورو (سی بی آئی) کی اپیلوں کو منظور کیا۔ کیرالا کے سابق پولیس سربراہ سبی میتھیوز اور گجرات کے سابق اے ڈی جی پی آر۔ بی۔ سری کمار اور کچھ دیگر سابق پولیس اور انٹیلی جنس بیورو افسران کو پیشگی ضمانت دینے کے حکم کو منسوخ کر دیا گیا۔تاہم سپریم کورٹ نے ہائیکورٹ سے کہا کہ وہ تمام پیشگی ضمانت کی درخواستوں پر چار ہفتوں کے اندر نئے سرے سے غور کرے۔ بنچ نے کہاکہ ہم ہائی کورٹ سے درخواست کرتے ہیں کہ وہ جلد از جلد پیشگی ضمانت کی درخواستوں پر حتمی فیصلہ لے۔
