چنئی: ہندوستانی خلائی تحقیقی ادارہ (اسرو) 15 اگست کو سری ہری کوٹا میں اسپیس پورٹ سے چھوٹے سیٹلائٹ لانچ وہیکل (ایس ایس ایل وی) کا استعمال کرتے ہوئے 175.5 کلوگرام وزنی ارتھ آبزرویشن سیٹلائٹ (ای اوایس-08) لانچ کرے گا۔یوم آزادی کے موقع پر، ایس ایس ایل وی۔ڈی3، اپنی تیسری اور آخری ترقیاتی پرواز میں، مائیکرو سیٹلائٹ کے ساتھ شار رینج سے صبح 9:17 بجے اڑان بھرے گا۔اسرو نے جمعرات کو ‘ایکس’ پوسٹ میں کہاکہ ایس ایس ایل وی۔ڈی3/ای اوایس-08 مشن: ایس ایس ایل وی کی تیسری اور آخری پرواز 15 اگست کو سری ہری کوٹا سے ہندوستانی وقت کے مطابق صبح 9:17 بجے ای اوایس-08 مائیکرو سیٹیلائٹ لانچ کرے گی۔اسرو نے کہا کہ یہ ایس ایس ایل وی ترقیاتی پروجیکٹ کو مکمل کرتا ہے اور ہندوستانی صنعت اور این ایس آئی ایل کے ذریعہ آپریشنل مشن کو قابل بناتا ہے ۔ای اوایس-08، اسرو کا جدید ترین ارتھ آبزرویشن سیٹلائٹ ہے ، جس کے بنیادی مقاصد میں ایک مائیکرو سیٹلائٹ کو ڈیزائن اور تیار کرنا، مائیکرو سیٹلائٹ بس کے ساتھ مطابقت پذیر پے لوڈ آلات بنانا اور مستقبل کے آپریشنل سیٹلائٹس کے لیے درکار نئی ٹیکنالوجیز کو شامل کرنا شامل ہے ۔اسرو نے کہاکہ “175.5 کلوگرام وزنی، یہ سیٹلائٹ تین پے لوڈ لے جائے گا، جو مٹی کی نمی کی تشخیص سے لے کر ڈیزاسٹر مینجمنٹ تک کے مختلف علاقوں میں استعمال کے لیے ڈیزائن کیے گئے ہیں۔ “یہ خلائی جہاز 475 کلومیٹر کی بلندی پر ایک سرکلر نچلی زمین کے مدار میں تقریباً ایک سال تک رہے گا۔
