لکھنؤ: اترپردیش کے وزیر اعلی یوگی آدتیہ ناتھ نے نوجوانوں کو نوکری سمیت روزگار کے زیادہ مواقع دستیاب کرانے کیلئے عزم کا اظہار کرتے ہوئے محکمہ بیسک ایجوکیشن میں 31661اسسٹنٹ ٹیچروں کی تقرری کو ایک ہفتے کے اندر مکمل کرنے کی ہدایت دی ہے ۔ریاستی حکومت کے ترجمان نے ہفتہ کو یہاں بتایا کہ بیسک ایجوکیشن ڈپارٹمنٹ کی جانب سے اسسٹنٹ ٹیچروں کی 69000خالی جائیدادوں پر بھرتی کے لئے 6جنوری 2019 کو ٹی ای ٹی کا امتحان منعقد کرایاگیا تھا۔ سات جنوری 2019 کوجنرل زمرے کے امیدواروں کی کامیابی کے لئے 65فیصدی جبکہ بیک ورڈ و اوبی سی زمرے سے تعلق رکھنے والے امیدواروں کی کامیابی کے لئے کم از کم 60فیصد ی نمبرات طے کئے گئے تھے ۔اس نوٹیفکیشن کے ضمن میں کچھ امیدواروں کے ذریعہ ہائی کورٹ میں پٹیشن دائر کی گئی تھی۔ ہائی کورٹ نے پٹیشن پر سماعت کرتے ہوئے 29مارچ 2020 کو حکومت کے موقف کی تائید کی تھی۔ترجمان نے بتایا کہ ہائی کورٹ نے 21مئی 2020 کے اپنے فیصلے میں ریاستی حکومت کو ہدایت دی ہے کہ جن سیٹوں پر شکچھا متر تعینات ہیں ان کو چھوڑ کر باقی خالی عہدوں پر تقررات کئے جائیں۔ترجمان نے بتایا کہ اسی ضمن میں وزیر اعلی یوگی آدتیہ ناتھ نے حکم دیا ہے کہ 31661خالی اسامیوں پر تقرری کی کاروائی ایک ہفتے میں مکمل کی جائے ۔
