ایڈیلیڈ ۔30 نومبر (سیاست ڈاٹ کام ) آسٹریلیا کے سابق کپتان اسٹیو اسمتھ نے ٹسٹ کرکٹ میں 73سال پرانا ریکارڈ توڑکر تیز ترین 7000 رنز بنانے کا نیا عالمی ریکارڈ قائم کردیا۔پاکستان اور آسٹریلیا کے درمیان ایڈیلیڈ میں کھیلئے جارہے سیریز کے دوسرے ٹسٹ میں ڈیوڈ وارنر نے ٹرپل سنچری اسکور کر کے اس میچ کو یادگار بنا لیا تو اسمتھ نے 7 ہزاررنز کی دوڑ میں ریکارڈ اپنے نام کرلیا ہے۔ صرف 36 رنز پر آؤٹ ہونے کے باوجود یہ میچ اسٹیو اسمتھ کے لیے یادگار بن گیا کیونکہ اس میچ میں ناصرف انہوں نے سر ڈان بریڈ مین سے زیادہ رنز بنانے کا اعزاز حاصل کیا بلکہ ساتھ ہی انہوں نے تیز ترین 7ہزار رنز بنانے کا نیا عالمی ریکارڈ قائم کردیا۔ اسٹیون اسمتھ بڑی اننگز کھیلنے میں ناکام رہے اور 36رنز بنانے کے بعد شاہین شاہ آفریدی کو وکٹ دے بیٹھے۔تاہم انہوں نے اس مختصر اننگز کے دوران ٹسٹ کیریئر کے 7ہزار رنز مکمل کر لیے اور سب سے کم میچز اور اننگز یہ اعزاز حاصل کرنے والے کرکٹر بن گئے۔ اسٹیو اسمتھ نے 70ٹسٹ اور 126اننگز میں یہ کارنامہ انجام دیا جبکہ اس سے قبل یہ ریکارڈ انگلینڈ کے والی ہیمنڈ کے پاس تھا جنہوں نے 131 اننگز میں یہ کارنامہ انجام دیا تھا۔ 7ہزار رنز بنا کر اسمتھ نے عظیم ترین سر ڈان بریڈ مین کو بھی پیچھے چھوڑ دیا جنہوں نے کیریئر میں6996 رنز اسکورکیے تھے اور اگر وہ اپنی آخری اننگز میں صفر پر آؤٹ نہ ہوتے اورمزید 4 رنز بنا لیتے توصرف 80 اننگز میں یہ کارنامہ انجام دینے والے کھلاڑی بن جاتے۔
