سڈنی ۔11 اکٹوبر (سیاست ڈاٹ کام ) آسٹریلیا کے سابق کپتان اور ٹسٹ کرکٹ کے عالمی نمبر ایک بیٹسمین اسٹیو اسمتھ گزشتہ 3 سال کے دوران پہلی مرتبہ ناکامی سے دوچار ہوگئے۔ اس مرتبہ یہ منفرد ناکامی ان کی فرسٹ کلاس کرکٹ میں بطور بیٹسمین رہی جس کے بارے میں کرکٹ آسٹریلیا نے ٹوئٹ بھی کیا۔ سماجی رابطے کی ویب سائٹ ٹوئٹر پر کرکٹ آسٹریلیا کی جانب سے ایک ویڈیو شائع کی گئی جس میں دیکھا جاسکتا ہے کہ نیو ساؤتھ ویلز کی نمائندگی کرتے ہوئے کوئنزلینڈ کے بولر کیمرون گینن نے انہیں آؤٹ کردیا۔ اس ٹوئٹ میں انہوں لکھا کہ اسمتھ بالآخر ایک انسان ہی ہیں جوگابا کے میدان میں آسٹریلین فرسٹ کلاس ٹورنمنٹ شیفلڈ شیلڈ کے ایک میچ میں بغیر کوئی رن بنائے پویلین لوٹ گئے۔ نومبر 2016 کے بعد فرسٹ کلاس کرکٹ میں اسٹیو اسمتھ پہلی مرتبہ بغیر کوئی رن بنائے آؤٹ ہوئے۔خیال رہے کہ نومبر 2016 میں پرتھ کے مقام پر جنوبی افریقہ کے خلاف تین میچوں کی سیریز کے پہلے ٹسٹ میچ میں اسٹیو اسمتھ اسپنر کیشو مہاراج کی گیند پر بغیر کوئی رن بنائے آؤٹ ہوئے تھے۔ مذکورہ میچ میں جنوبی افریقہ نے 177 رنز کے بھاری فرق سے کامیابی بھی حاصل کی تھی۔ یاد رہے کہ رواں برس اسٹیو اسمتھ نے انگلینڈ کے خلاف ایشز سیریز میں 774 رنز اسکور کرکے نمایاں بیٹسمین رہے۔ اس سیریز کے دوران اسٹیو اسمتھ نے 2 سنچریاں اور ایک ڈبل سنچری بھی اسکور کی ۔ یہ سیریز برابری پر ختم ہوئی تاہم گزشتہ ایشز جیتنے کی وجہ سے یہ ٹرافی آسٹریلیا کے ہی پاس رہی۔یاد رہے کہ بال ٹمپرنگ تنازعہ اور ایک سالہ پابندی سے واپسی کے بعد اسمتھ انتہائی شاندار فارم میں ہیں۔
