لاس اینجلس، 26 اگست (یواین آئی) امریکی نجی خلائی کمپنی اسپیس ایکس نے پیر کو اپنے طاقتور اسٹار شپ راکٹ کا 10واں فلائٹ ٹسٹ خراب موسم کی وجہ سے منسوخ کر دیا۔لانچ ابتدائی طور پر ٹیکساس میں کمپنی کی اسٹاربیس سہولت سے اتوار کے لئے شیڈول تھا لیکن مسائل کی وجہ سے ملتوی کر دیا گیا اور پیر کیلئے دوبارہ شیڈول کیا گیا۔ گزشتہ روز لانچ کی کوشش ٹی-مائنس 40 سیکنڈ پر روک دی گئی جس کے بعد اسپیس ایکس نے سوشل میڈیا پلیٹ فارم ایکس پر بتایا کہ لانچ کو خراب موسم کی وجہ سے منسوخ کر دیا گیا ہے ۔اسپیس ایکس نے کہا کہ ٹیم لانچ کیلئے اگلے بہترین دستیاب موقع کی تلاش کر رہی ہے ۔ اس میں کہا گیا ہے کہ 10ویں فلائٹ ٹسٹ کا مقصد پچھلے مشنوں کی طرح ہی مقاصد حاصل کرنا ہے ، جس میں اسٹارشپ کی پہلی پے لوڈ تعیناتی اور لانچ سائٹ پر اوپری مرحلے کی واپسی کیلئے تیار کئے گئے کئی دوبارہ داخلے کے تجربات شامل ہیں۔اسپیس ایکس کا اسٹار شپ خلائی جہاز اور سپر ہیوی راکٹ، جسے اجتماعی طور پر اسٹارشپ کہا جاتا ہے ، ایک مکمل طور پر دوبارہ استعمال کے قابل نقل و حمل کا نظام ہے جو عملے اور کارگو دونوں کو زمین کے مدار، چاند، مریخ اور اس سے آگے لے جانے کیلئے ڈیزائن کیا گیا ہے ۔
