میڈرڈ۔ 19 ؍جنوری ( ایجنسیز )جنوبی اسپین میں 2 ہائی اسپیڈ ٹرینوں کی آپس میں ہوئی خوفناک ٹکر میں ہلاکتوں کی تعداد بڑھ کر 39 پہنچ گئی ہے۔ اس حادثہ میں 100 سے زائد افراد زخمی بتائے جا رہے ہیں جن کا مختلف ہاسپٹلس میں علاج چل رہا ہے۔ یہ حادثہ کارڈوبا علاقہ واقع آدموز کے قریب پیش آیا، جس سے افرا تفری کا ماحول پیدا ہو گیا۔ حادثہ کے بعد میڈرڈ اور اندلس کے درمیان ریل خدمات بھی معطل ہو گئی۔ ملاگا سے میڈرڈ جارہی ایک ٹرین پٹری سے اتر گئی اور سامنے سے آ رہی دوسری ٹرین سے ٹکرا گئی۔ دونوں ٹرینوں میں تقریباً 500 مسافر سوار تھے۔ اندیشہ ظاہر کیا جا رہا ہے کہ مہلوکین کی تعداد مزید بڑھ سکتی ہے، کیونکہ زخمیوں میں سے کئی کی حالت سنگین بنی ہوئی ہے۔اسپینش ریل آپریٹر اے ڈی آئی ایف نے بتایا کہ اتوار کو جنوبی اسپین میں ایک تیز رفتار ٹرین پٹری سے اتر گئی اور برعکس سمت سے آ رہی ٹرین سے ٹکرا گئی۔ ایمرجنسی سروسز نے ابتدائی جانکاری میں بتایا تھا کہ اس ٹکر میں 21 لوگوں کی موت ہوئی جبکہ 70 دیگر زخمی ہوئے ہیں لیکن بعد میں مہلوکین کی تعداد 39 تک پہنچ گئی۔ سیول گارڈ کا کہنا ہے کہ کئی لوگ گھنٹوں ڈبوں کے اندر پھنسے رہے ۔اس حادثہ کے بعد میڈرڈ کے ہاسپٹلس کو بھی الرٹ پر رکھا گیا ہے۔ زخمی مسافروں کو 6 مختلف ہاسپٹلس میں داخل کیے جانے کی خبریں بھی سامنے آئی ہیں۔ حادثہ کے بعد میڈرڈ اور اندلس کے درمیان چلنے والی ہائی اسپیڈ ٹرینوں کو پوری طرح سے معطل کر دیا گیا ہے۔ عہدیداروں نے بتایا کہ سیکورٹی کا خیال کرتے ہوئے اس راستے میں چل رہی سبھی ٹرینوں کو ان کے ابتدائی اسٹیشنوں پر واپس بھیج دیا گیا ہے۔