میڈرڈ۔2 ستمبر (سیاست ڈاٹ کام) اسپین کی پہلی ونٹر اولمپکس میڈلسٹ بلانکا فرنانڈز اوچھاؤ لاپتہ ہوگئیں۔مقامی پولیس نے ایک ہفتہ تلاش کے بعد اب عوام سے اپیل کی ہے کہ وہ ان سے متعلق کوئی اطلاعات ہوتو انھیں آگاہ کریں۔ 56 سالہ سابق الپمپئن اسکیئر 23 اگست سے لاپتہ ہیں۔ انھیں آخری مرتبہ میڈرڈ کے ایوارکا ڈسٹرکٹ میں اپنی بلیک مرسڈیز چلاتے ہوئے دیکھا گیا تھا۔ ان کی بیٹی اولیویا فریسینڈا نے اپنی والدہ کی گمشدگی کی رپورٹ 23 اگست کو کردی ہے، وہ بھی انتہائی فکرمند ہیں۔ اوچھاؤ اپنے گھر سے بغیر فون لیے نکلی تھیں اور اب تک ان کا کریڈٹ کارڈ بھی کہیں استعمال نہیں ہوا ہے۔ یاد رہے کہ انہوں نے 1980 تا 1992 کے درمیان 4 ونٹر اولمپکس میں ملک کی نمائندگی کی۔ انہوں نے 1992 گیمز میں اسپین کی پہلی میڈلسٹ ہونے کا اعزاز بھی پایا تھا ۔
