نئی دہلی: لوک سبھا کے اسپیکر اوم برلا نے جمعرات کو حکومت کو ہدایت دی کہ وہ ایئر لائنز کی مسافر ٹکٹ بکنگ سائٹس پر دکھائے گئے کرایہ اور بکنگ کے وقت وصول کیے گئے اصل کرایہ کے درمیان بڑے فرق کی شکایت کی جانچ کرے ۔جب ڈی ایم کے کے رکن دیاندھی مارن نے وقفہ سوالات کے دوران یہ مسئلہ اٹھایا، برلا نے شہری ہوابازی کے وزیر کے رام موہن نائیڈو سے معاملے کی تحقیقات کرانے کو کہا۔ انہوں نے کہا کہ ممبران پارلیمنٹ کا کرایہ لوک سبھا سکریٹریٹ ادا کرتا ہے ، اس لیے اس کی تحقیقات مزید ضروری ہو گئی ہیں۔قبل ازیں مارن نے شکایت کی تھی کہ وستارا ایئر لائنز کے آن لائن ٹکٹ بکنگ سے پہلے دکھائے گئے کرایوں میں بکنگ کے وقت کافی اضافہ ہو جاتا ہے ۔ انہوں نے کہا کہ وہ یہ شکایت ذاتی تجربے کی بنیاد پر کر رہے ہیں۔ مارن نے کہا کہ بکنگ سے قبل چنئی اور دہلی کے لیے فلائٹ کا کرایہ بکنگ سائٹ پر دکھایا جا رہا تھا، جس میں بکنگ کے وقت تقریباً 10,000روپے کا اضافہ ہوا۔ انہوں نے کہا کہ ٹکٹ بکنگ کے درمیان میں ایک رکاوٹ ظاہر ہوئی اور اس کے بعد کرایہ بڑھ گیا۔
