حکومت کی لاپرواہی سے غریب طلبہ کا مستقبل تباہ ‘ ایم ایل سی کویتا کا الزام
حیدرآباد۔8فروری (شاہنوازبیگ ) رکن قانون سازکونسل بی آرایس کلواکنٹلہ کویتا نے کانگریس حکومت پر شدید تنقید کی اور کہاکہ امبیڈکر اوورسیز اسکالرشپ اسکیم کے تحت فنڈس کی عدم اجرائی کے باعث غریب طلبہ بیرون ممالک میں حصول تعلیم سے محروم ہیں۔انہوںنے کہاکہ حکومت فیس بازادائیگی (فیس ری ایمبرسمنٹ )کے فنڈس کی بھی عدم اجرائی کے ذریعہ لاپرواہی کا مظاہرہ کررہی ہے۔کے کویتا نے تلنگانہ کے بیرون ممالک میں زیر تعلیم طلبہ سے زوم ایپ کے ذریعہ گفتگو کی۔تلنگانہ کے طلبہ امبیڈکر اوورسیز اسکالر شپ اسکیم کے تحت بیرون ممالک میں اعلیٰ تعلیم حاصل کررہے ہیں۔آن لائن اجلاس میں تقریباً200طلبہ نے شرکت کی۔کے کویتا نے کہاکہ بی آرایس دورحکومت میں کے سی آر نے غریب طلبہ کو بیرون ممالک میں اعلیٰ تعلیم کے حصول کا موقع فراہم کرنے کیلئے اوورسیز اسکالر شپ اسکیم کو متعارف کروایاتھا۔تاہم موجودہ چیف منسٹر ریونت ریڈی اس اسکیم پر عمل نہیں کررہے ہیں۔جس کی وجہ سے بیرون ممالک میں غریب طلبہ کا مستقبل تباہی کے دہانے پر پہنچ گیاہے۔انہوںنے مطالبہ کیاکہ ریاستی حکومت اس بات کی وضاحت کرے کہ غریب طلبہ کے ساتھ آخر ناانصافی کیوں کی جارہی ہے؟کویتا نے کہاکہ اسکالرشپ نہ ملنے کی وجہ سے کئی طلبہ شدید مشکلات کا شکار ہیں اور اپنی تعلیم کو جاری رکھنے کیلئے بے صبری سے اسکالرشپ کے منتظر ہیں۔سابق رکن پارلیمان نظام آباد نے کہاکہ حکومت ‘کنٹراکٹرس کو تو ادائیگیاں عمل میں لارہی ہے تاہم طلبہ کے تعلیمی بقایہ جات کی ادائیگی کیلئے فنڈس نہ ہونے کا بہانہ بنایاجارہاہے۔انہوںنے کہاکہ نہ صرف اوورسیز اسکالرشپ بلکہ تمام اقسام کے اسکالرشپ اور فیس بازادائیگی کے بقایہ جات کی عدم اجرائی افسوسناک ہے۔آخر میں کے کویتا نے حکومت سے پرزور مطالبہ کیاکہ وہ فی الفور فنڈس کی اجرائی عمل میں لائے۔بصورت دیگر عوامی سطح پر شدید صدائے احتجاج بلند کیاجائے گا اور فنڈس کی اجرائی کیلئے ریاستی حکومت کو مجبور کیاجائے گا۔
