نئی دہلی۔6 اپریل (سیاست ڈاٹ کام) مرکزی برائے فروغ انسانی وسائل رمیش پوکھریال نشانک نے کہا کہ حکومت ملک میں کوروناوائرس کی صورتحال کا جائزہ لینے کے بعد اسکولوں اور کالجوں کے دوبارہ آغاز کے بارے میں 14 اپریل کو فیصلہ کرے گی۔خبر رساں ادارے کو انٹرویو دیتے ہوئے انہوں نے کہا کہ طلباء اور اساتذہ کا تحفظ حکومت کے لئے انتہائی اہمیت کا حامل ہے اور ان کی وزارت اس بات کو یقینی بنانے کے لئے تیار ہے کہ اگر اسکولوں اور کالجوں کو 14 اپریل سے بھی بند رہنے کی ضرورت ہے تو طلباء کو کسی قسم کا تعلیمی نقصان نہ ہو۔اس وقت فیصلہ لینا مشکل ہے۔ ہم 14 اپریل کو صورتحال کا جائزہ لیں گے اور حالات پر منحصر ہوکر اس بارے میں فیصلہ لیا جائے گا کہ کیا اسکول اور کالج اب دوبارہ کھولے جاسکتے ہیں یا زیادہ وقت کے لئے بند کرنا پڑے گا۔ پوکھریال نے کہا کہ ملک میں 34 کروڑ طلبا ہیں ، جو امریکہ کی آبادی سے زیادہ ہیں۔ طلباء اور اساتذہ کا تحفظ حکومت کے لئے انتہائی اہمیت کا حامل ہے۔21 روزہ ملک گیر لاک ڈاؤن کا اختتام 14 اپریل کو ہوگا۔ حکومت کی طرف سے ایسے اشارے ملے ہیں کہ لاک ڈاؤن میں توسیع نہیں کی جائے گی۔تاہم لاک ڈاؤن کا اعلان ہونے سے پہلے ہی اسکولوں اور کالجوں کی کلاسوں کو پہلے ہی معطل کردیا گیا تھا لیکن کلاس پہلے ہی متعدد سرکاری پلیٹ فارم جیسے سویم کا استعمال کرکے آن لائن کرائے جارہے ہیں۔
