خلاف ورزی پر سخت کارروائی کا انتباہ ، محکمہ تعلیمات سے احکامات کی اجرائی
حیدرآباد۔8ستمبر۔ (سیاست نیوز) محکمہ تعلیم نے خانگی و کارپوریٹ اسکولو ںکے انتظامیہ کیلئے جاری کردہ رہنمایانہ خطوط میں اسکول انتظامیہ کو اس بات کی ہدایت دی کہ وہ فیس کی عدم ادائیگی ‘ یونیفارم نہ ہونے اور درسی کتب حاصل نہ کرنے کی پاداش میں کسی طالب علم کو اسکول سے نہ نکالیں ۔علاوہ ازیں طلبہ کو شخصی طو ر پر کلاسس میں حاضر رہنے کیلئے مجبور نہ کیا جائے۔ محکمہ تعلیم کی جانب سے جاری کردہ احکامات میں واضح طور پر کہا گیا ہیکہ اسکول میں اسمبلی ‘ کھیل کود اور گروپ ورک جیسی سرگرمیاں تاحکم ثانی منعقد نہ کی جائیں۔ طلبہ کو کورونا وائرس سے محفوظ رہنے کیلئے اختیار کی جانے والی احتیاطی تدابیر سے واقف کروایا جائے۔ حکومت تلنگانہ کی جانب سے جاری کردہ احکامات میں اسکول انتظامیہ کو واضح ہدایات جاری کی گئی ہیں کہ وہ تعلیمی سال 2021-22 کے دوران بھی فیس میں کسی قسم کا اضافہ نہ کریں اور ماہانہ فیس وصول کریں۔ اسکول حاضر نہ ہونے والے طلبہ پر کسی قسم کی زبردستی نہ کی جائے اور نہ ہی ان پر کوئی جرمانہ عائد کیا جائے بلکہ جو طلبہ آن لائن تعلیم جاری رکھنا چاہتے ہیں ان کیلئے آن لائن تعلیم کا بھی انتظام کیا جائے ۔ محکمہ تعلیم کی جانب سے جاری کردہ رہنمایانہ خطوط میں طلبہ کی جانب سے گلاس ‘ بوتل‘ پانی‘ ربر ‘ پنسل ‘ پلیٹس وغیرہ کے آپس میں تبادلہ پر امتناع عائد کیا گیا ہے اور اسکول انتظامیہ کو اس بات کا پابند بنایا گیا ہے کہ وہ طلبہ کو کورونا وائرس سے محفوظ رہنے کے ان رہنمایانہ خطوط پر عمل آوری کو یقینی بنائیں۔ کلاسس میں شرکت کرنے کیلئے اسکول پہنچنے والے طلبہ میں کورونا وائرس کی کوئی بھی علامت پائی جاتی ہے یا انہیں سردی ‘ کھانسی ‘ بخار‘ نزلہ ہوتا ہے تو ایسی صورت میں اسکول انتظامیہ کو فوری علامات سے متاثرہ طالب علم کو قریبی پرائمری ہیلت سنٹر سے رجوع کرنا ہوگا۔ محکمہ تعلیم کی جانب سے تیار کئے گئے رہنمایانہ خطوط جو ریاست کے تمام سرکاری ‘ خانگی اور سرکاری اسکولوں کے ذمہ داروں کو روانہ کئے گئے ہیں ۔M
ان رہنمایانہ خطوط کو عدالت میں بھی داخل کیا جاچکا ہے۔ رہنمایانہ خطوط پر عمل آوری نہ کرنے والے اسکول انتظامیہ کے خلاف شکایات موصول ہونے پر کاروائی کا انتباہ بھی دیا گیا ہے اور کہا جار ہاہے کہ جن اسکولوں کی جانب سے آن لائن کلاسس کا سلسلہ ترک کرتے ہوئے طلبہ کو کلاسس میں شرکت کے لئے مجبور کیا جا رہاہے ان اسکولوں کی تفصیلات جمع کی جار ہی ہیں ۔محکمہ تعلیم کی جانب سے جاری کردہ رہنمایانہ خطوط پر عمل نہ کرنے والے اسکولوں کے خلاف کاروائی کے لئے ڈپٹی ایجوکیشنل آفیسر س کو مجاز قرار دیا گیا ہے اور اس کے علاوہ ضلع انتظامیہ کی جانب سے بھی اس پر خصوصی نظر رکھی جائے گی۔M