نئی دہلی،26جون(سیاست ڈاٹ کام)راجیہ سبھا کے چیئرمین ایم وینکیا نائیڈو نے ایوان کے اراکین کے برتاؤ پر تبصرہ کرتے ہوئے چہارشنبہ کو کہا کہ اس سے بہتر تو اسکول ہوتا ہے ۔ وینکیا نائیڈو نے صبح ایوان کی کارروائی شروع کرتے ہوئے ضروری دستاویز میز پر رکھوائے اور اراکین سے خطاب کرتے ہوئے کہا کہ انہیں اپنا بیان دیتے ہوئے مقررہ مدت کا دھیان رکھنا چاہئے ۔بیان دیتے وقت دیگر اراکین کو دھیرے بولنا چاہئے اور کارروائی میں رکاوٹ پیدانہیں کرنی چاہئے ۔ایوان کے نظام کو برقرار رکھنے کے لئے یہ ضروری ہے کہ سبھی اراکین ایوان کے ضابطوں پر عمل کریں۔ چیئرمین نے کہا،‘‘کسی رکن نے کہا ہے کہ یہ کوئی اسکول ہے ؟ارے بھائی ،اسکول تو اس سے بہتر ہوتا ہے ۔وہاں کارروائی تو کرسکتے ہیں’’۔قابل ذکر ہے کہ چیئرمین ایوان کا کام کاج مناسب انداز میں چلانے کے لئے نظام برقرار رکھنے پر زور دیتے ہیں اور اراکین سے ایوان کے ضابطوں اور روایات پر عمل کرنے کی اپیل کرتے ہیں۔ اس کے بعد چیئرمین نے صدر جمہوریہ کے خطاب پراظہار تشکر پر بحث کرانے کے لئے وقفہ صفر اور وقفہ سوال نہ کرانے کا اعلان کیا اور تقریر کرنے کے لئے اراکین کے نام پکارے ۔بہوجن سماج پارٹی کے ویر سنگھ کو بولنے کے لئے 10منٹ کا وقت مانگنے پر وینکیا نائیڈو نے کہا،‘‘میں کیا کروں ؟عوام نے آپ کو وقت دیا ہی نہیں۔’’ مسٹر سنگھ کو اپنا بیان دینے کے لئے تین منٹ کا وقت دیاگیاتھا۔
