زرد الرٹ جاری ۔ متعلقہ محکموں کو چوکس کردیا گیا
حیدرآباد 9 جولائی (سیاست نیوز) تلنگانہ کے بیشتر اضلاع میں آئندہ تین یوم میں گرج اور چمک کے ساتھ موسلادھار بارش کی پیش قیاسی کی گئی ہے۔ محکمہ موسمیات کے اعلامیہ میں کہا گیا ریاست میں آئندہ تین یوم میں کئی اضلاع میں بارش ہوسکتی ہے ۔ ریاست میں مانسون سرگرم ہونے کے باوجود شہر میں بارش نہ ہونے کے سبب شہریوں میں تشویش پائی جارہی ہے۔ محکمہ موسمیات نے جو اعلامیہ جاری کیا اس کے مطابق اضلاع سوریہ پیٹ ‘ نلگنڈہ ‘ محبوب آباد‘ ملوگو‘ بھدادری کتہ گوڑم ‘ بھوپل پلی ‘ جنگاؤ وقارآباد ‘ سنگاریڈی ‘ میدک‘ کاماریڈی ‘ محبوب نگر ‘ ونپرتی‘ عادل آباد ‘ کمرم بھیم آصف آباد‘ منچریال ‘نرمل میں آئندہ تین یوم بارش کی پیش قیاسی کے ساتھ زردالرٹ جاری کیا گیا اور کہا جا رہاہے کہ موسلادھار بارش کے سبب پیدا ہونے والے حالات سے محفوظ رہنے متعلقہ محکمہ جات کو الرٹ کردیا گیا ہے۔ دیگر اضلاع ہنمکنڈہ ‘ نظام آباد‘ ورنگل ‘ سدی پیٹ ‘ کریم نگر اور پداپلی کے علاقوں میں بھی بارش کی پیش قیاسی کی گئی ہے۔ ماہرین کی جانب سے حیدرآبادوسکندرآباد کے علاوہ ملکاجگری اور میڑچل کے موسم کی کوئی پیش قیاسی نہیں کی گئی کیونکہ گذشتہ کئی دنوں سے شہر میں بارش کی پیش قیاسی کے باوجود گرمی کا سلسلہ برقرار ہے۔م
اے پی میں پانی کا تیز بہاو، بائیک بہہ گئی
حیدرآباد9جولائی (یو این آئی) اے پی کے ضلع الوری سیتاراما راجو میں شدید بارش سے کئی دریاوں اور تالابوں کی آبی سطح میں اضافہ ہوا ۔ضلع کے بیری گوڑہ علاقہ میں پانی کے شدید بہاو کے نتیجہ میں ایک بائیک بہہ گئی۔اس کا ویڈیو سوشیل میڈیا پر وائرل ہوگیا۔اس ویڈیو میں دیکھاجاسکتا ہے کہ ایک شخص بائیک کو اپنے کندھے پر رکھتے ہوئے نہر کو پار کرنے کی کوشش کررہا ہے کہ اچانک بہاوکے سبب اس کی بائیک بہہ گئی۔
