کراچی ۔11 ڈسمبر (سیاست ڈاٹ کام) ٹسٹ ٹیم کے کپتان اظہر علی نے 10سال بعد دوبارہ پاکستان کا دورہ کر کے پاکستان میں ٹسٹ کرکٹ بحال کرنے پر سری لنکائی کرکٹ ٹیم کا شکریہ ادا کیا ہے۔ پاکستان اور سری لنکا کے درمیان راولپنڈی میں دو ٹسٹ میچوں کی سیریز کا پہلا میچ کھیلا جارہا ہے اور اس کے ساتھ ہی پاکستان میں 10سال کے طویل عرصے کے بعد ٹسٹ کرکٹ کی واپسی ہوئی ہے۔ راولپنڈی میں اپنے سری لنکائی ہم منصب دمتھ کرونارتنے کے ہمراہ پریس کانفرنس سے خطاب کرتے ہوئے اظہر علی نے کہا کہ یہ ایک تاریخی موقع ہے اور تمام کھلاڑی اس کا حصہ بننے پر بہت پرجوش ہیں۔انہوں نے کہا کہ ہم یہاں آنے پر سری لنکن ٹیم کے شکر گزار ہیں، ہم نے آخری ٹسٹ میچ بھی انہی کے خلاف کھیلا تھا لہٰذا ان کے دورے سے دنیا کو ایک اچھا پیغام جائے گا کہ ہمیں ایک دوسرے کا تعاون کرنے کی ضرورت ہے۔ یاد رہے کہ مارچ 2009 میں لاہور میں ٹسٹ میچ کے لیے اسٹیڈیم آنے والی سری لنکائی ٹیم کی بس پر دہشت گردوں نے حملہ کیا تھا جس کے نتیجے میں 8 افراد ہلاک ،کھلاڑیوں اور عہدیداروں سمیت متعدد افراد زخمی ہوئے تھے۔ اس حملے کے بعد پاکستان پر کرکٹ سمیت عالمی کھیلوں کے دروازے بند ہو گئے تھے اور پاکستانی ٹیم کو اپنی تمام ہوم سیریز متحدہ عرب امارات پرکھیلنا پڑا۔ یہاں یہ بات قابل ذکر ہے کہ سری لنکائی ٹیم 1992سے پاکستان میں کوئی سیریز نہیں ہاری اور اس کے بعد سے اب تک کھیلی گئی چار سیریز میں سے انہوں نے دو میں فتح حاصل کی جبکہ دو سیریز ڈرا ہوئیں۔ دو سال قبل سری لنکا نے متحدہ عرب امارات کے میدانوں میں پاکستان کو ٹسٹ سیریز میں 0-2 سے مات دی تھی ۔
