لاہور 30 جون (یو این آئی) پاکستان کرکٹ بورڈ (پی سی بی) نے اظہر محمود کو ٹسٹ ٹیم کا قائم مقام ہیڈ کوچ مقرر کر دیا ہے ۔اظہر محمودکی تقرری کے حوالے سے پی سی بی کی جانب سے جاری کردہ بیان میں کہا گیا ہے کہ اظہر محمود نے بڑے تجربے کے ساتھ پاکستانی ٹیم کے اسسٹنٹ ہیڈ کوچ کا عہدہ سنبھالا ہے ۔ وہ طویل عرصے سے ٹیم کے اسٹریٹجک کور کا اہم حصہ رہے ہیں۔ کرکٹ کے بارے میں ان کا گہرا علم، بین الاقوامی تجربہ اور انگلش کاؤنٹی سرکٹ میں کامیابی حاصل کرنا ،انہیں اس عہدے کے لیے غیر معمولی طور پر بہتر انتخاب بناتا ہے ۔ انہوں نے کہا کہ اظہرمحمود اپنے موجودہ معاہدے کی میعاد ختم ہونے تک اپنے عہدے پر برقرار رہیں گے ۔ اگلے ٹسٹ میچز اکتوبر میں جنوبی افریقہ کے خلاف گھریلو میدان پر اور دسمبر، جنوری میں سری لنکا کے خلاف گھریلو سیریز میں بھی برقرار رہیں گے ۔ اظہرمحمود 2024 کے اوائل میں پاکستان کے نیوزی لینڈ کے وائٹ بال ٹور سے قبل عبوری بنیادوں پر شامل ہونے کے بعد سے پاکستان کی ٹیم کے اسسٹنٹ کوچ رہے۔ 50 سالہ سابق آل راؤنڈر نے 20 سال کی عمر میں کرکٹ کا آغاز کیا تھا۔ انہوں نے 143ونڈے اور 21 ٹسٹ میچوں میں اپنے ملک کی نمائندگی کی۔ انہوں نے اپنے بین الاقوامی کیریئر میں تین سنچریاں اسکور کیں اور 162 وکٹیں حاصل کیں، جس کے بعد وہ ریٹائر ہو گئے تھے ۔
