لکھنؤ: اترپردیش کی آٹھارویں قانون ساز اسمبلی کے اجلاس کے آغاز سے ایک دن قبل پارٹی کے اراکین اسمبلی اعظم خان اور شیو پال سنگھ یادو نے سماج وادی پارٹی کے صدر دفتر میں بلائی گئی لیجسلیچر پارٹی کے اجلاس میں شرکت نہیں کی۔ ایس پی لیڈروں نے کہا کہ اعظم خان جنہیں حال ہی میں سیتا پور جیل سے ضمانت پر رہا کیا گیا تھا وہ رام پور میں ہیں اور صحت کی وجوہات کی وجہ سے میٹنگ میں شرکت نہیں کرسکے ہیں۔ اعظم خان کے علاوہ رام پور کے ایس پی رکن اسمبلی، ان کے بیٹے اور رکن اسمبلی عبداللہ اعظم اور پرگتی شیل سماج وادی پارٹی (لوہیا) کے سربراہ شیو پال سنگھ یادو نے بھی لیجسلیچر پارٹی میٹنگ میں شرکت نہیں کی۔ عبداللہ اعظم رام پور ضلع کے سوار اسمبلی حلقہ سے انتخاب جیتے ہیں۔ایس پی کے سینئر لیڈر رویداس مہروترا نے کہا کہ اعظم خان اور ان کے بیٹے عبداللہ اعظم کل (پیر) کے اجلاس میں شرکت کریں گے۔انہوں نے کہا کہ اعظم خان صحت کی وجوہات کی بنا پر اجلاس میں شرکت نہیں کر سکے۔ مہروترا نے کہا کہ پیر کو اعظم خان پہلے قانون ساز اسمبلی کے رکن کی حیثیت سے حلف لیں گے اور پھر اجلاس میں شرکت کریں گے۔
