رامپور23جنوری(یواین آئی) سماج وادی پارٹی کے سینئر رہنما محمد اعظم خان نے اپنے ڈریم پروجیکٹ مولانا محمد علی جوہرٹرسٹ کی صدارت سے استعفیٰ دے دیا ہے ۔ یہ ٹرسٹ جوہر یونیورسٹی اور رامپور پبلک اسکول سمیت کئی تعلیمی ادارے چلاتا ہے ۔ اعظم خان کی مسلسل قید کے باعث ٹرسٹ کے کام کاج میں رکاوٹ آ رہی تھی۔ اعظم خان کی اہلیہ ڈاکٹر تزئین فاطمہ اور چھوٹے بیٹے عبداللہ اعظم نے بھی ٹرسٹ کے تمام عہدوں سے استعفیٰ دیا ہے ۔ ٹرسٹ میں نئی ذمہ داریوں کے تحت اعظم خان کی بہن نکہت اخلاق کو چیئرپرسن مقرر کیا گیا ہے ، جبکہ ان کے بڑے بیٹے ادیب اعظم کو سکریٹری بنایا گیا ہے ۔ سماج وادی پارٹی ایم ایل اے نصیر احمد خان کو جوائنٹ سکریٹری کی ذمہ داری دی گئی ہے ، جبکہ مشتاق احمد صدیقی اور جاوید الرحمن خان کو بالترتیب نائب صدر اورخازن مقرر کیا گیا ہے ۔
