نئی دہلی: کانگریس ہائی کمان نے چہارشنبہ کو یہاں کانگریس صدر ملک ارجن کھرگے کی صدارت میں لوک سبھا انتخابات کیلئے حکمت عملی تیار کرنے کیلئے ایک میٹنگ منعقد کی جس میں پارٹی کے سرکردہ لیڈروں نے شرکت کی۔ پارٹی ذرائع کے مطابق کھرگے کے علاوہ پارٹی کے سابق صدر راہول گاندھی، دہلی کے کانگریس جنرل سکریٹری انچارج دیپک بابریہ، ریاستی صدر انیل چودھری، سینئر لیڈر اجے ماکن، سندیپ دکشت اور کئی اہم لیڈروں نے میٹنگ میں شرکت کی۔ کھرگے نے بھی اس سلسلے میں معلومات دیتے ہوئے کہا کہ لوک سبھا انتخابات کے پیش نظر آج دہلی کانگریس کے لیڈروں کے ساتھ مشاورت کی گئی۔ دہلی کانگریس کا نیا رابطہ ہماری ترجیح ہے ، جس میں تمام لیڈروں اور کارکنوں کی شرکت ضروری ہے ۔ ہم نے دہلی کو خوشحال بنایا تھا اور آگے بھی ہماری جدوجہد جاری ہے ۔راہول گاندھی نے کہا کہ آج دہلی کانگریس لیڈروں کے ساتھ ایک میٹنگ ہوئی۔ کانگریس پارٹی دہلی کے لوگوں کی آواز بلند کرنے اور ریاست کی ترقی کیلئے ہر قدم اٹھانے کیلئے وقف ہے ۔
