پاکستان اور جنوبی افریقہ کے درمیان پہلے ٹیسٹ میچ کے دوسرے دن کا کھیل ختم ہونے تک جنوبی افریقہ نے6 وکٹوں پر 216 رنز بنالئے تھے جبکہ وہ پاکستان کی پہلی باری سے ابھی162رنز پیچھے ہے۔قبل ازیں جنوبی افریقہ کے بولر سینوران متھوسامی کی تباہ کن بولنگ کے سامنے پاکستانی بلے باز ریت کی دیوار ثابت ہوئے اور پاکستان ٹیم اپنی پہلی اننگز میں 378 رنز پر آل آؤٹ ہوگئی۔سینوران متھوسامی نے دوسرے روز پہلے ہی سیشن میں چار وکٹیں حاصل کیں جبکہ میچ میں انہوں نے مجموعی طور پر 6 کھلاڑیوں کو پویلین کی راہ دکھائی۔ محمد رضوان 75 رنز بناکر آؤٹ ہوئے جبکہ اسی اوور کی پانچویں گیند پر نعمان علی صفر پر بولڈ ہوگئے، چھٹی گیند پر ساجد خان بھی بغیر کوئی رن بنائے کیچ تھما بیٹھے۔شاہین آفریدی بھی 7 رنز بناکر متھوسامی کا شکار بنے جبکہ سلمان علی آغا 93 رنز بناکر سبرائن کے گیند پر متھوسامی کے ہاتھوں کیچ آؤٹ ہوئے۔سینوران متھوسامی نے 6، پرینیلن سبرائن نے 2، کاگیسو ربادا اور سیمون ہارمر نے ایک ایک وکٹ حاصل کی۔قبل ازیں پاکستان نے 313 رنز 5 وکٹوں کے نقصان کے ساتھ دوسرے روز کے کھیل کا آغاز کیا اور ساری ٹیم378رنز بناکر اوٹ ہوگئی۔
