کابل ،28جون (سیاست ڈاٹ کام) افغانستان کے صوبہ دایکنڈی کے ضلع کجران میں واقع سلامتی دستوں کی چوکی پر جمعہ کی صبح طالبان انتہاء پسندوں کے حملہ میں آٹھ پولیس جوان ہلاک اور 16دیگر زخمی ہوگئے ۔صوبہ کے گورنر نے بتایاکہ آج علی الصبح سلامتی دستوں کی چوکی پر طالبان انتہاء پسندوں نے حملہ کیا جس میں پولیس کے آٹھ جوان ہلاک اور 16زخمی ہوگئے ۔انھوں نے بتایاکہ اس دوران سلامتی دستوں اور انتہاء پسندوں کے درمیان جھڑپ میں کچھ طالبان انتہاء پسندوں کا بھی جانی نقصان ہوا لیکن انکے ساتھی انھیں اپنے ساتھ لے جانے میں کامیاب رہے ۔انھوں نے کہاکہ کچھ دیر دونوں طرف سے ہوائی فائرنگ میں کتنے انتہاء پسند ہلاک ہوئے اسکا پتہ نہیں چل سکاہے ۔اس حملہ کے تعلق سے طالبان کی طرف سے کوئی رد عمل نہیں آیاہے ۔
وزیراعظم مودی کا دہشت گردی کے خلاف متحد ہوکر لڑنے پر زور
اوساکا، 28جون (سیاست ڈاٹ کام) وزیر اعظم نریندر مودی نے دہشت گردی کے خلاف متحد ہوکر لڑنے پر زوردیتے ہوئے دہشت گردی کی مالی امداد کے ساتھ اس خطرے سے نمٹنے کے لئے عالمی اجلاس کے دوران اپنے خیالات کا اظہار کیا۔
مسٹر مودی نے جمعہ کے روز جی ۔20 سربراہ اجلاس سے علیحدہ برکس (برازیل۔روس۔ہندوستان۔چین۔جنوبی افریقہ) لیڈروں کے غیر رسمی اجلاس سے خطاب کرتے ہوئے کہاکہ ‘‘دہشت گردی پوری انسانیت کے لئے سب سے بڑا خطرہ ہے ’’۔
انہوں نے کہاکہ ‘‘دہشت گردی نہ صرف معصوم لوگوں کی جان لیتی ہے ، بلکہ یہ اقتصادی ترقی کو متاثر کرکے سماجی استحکام پر منفی اثرات مرتب کرتی ہے ’’۔
وزیر اعظم نے مشورہ دیا کہ دہشت گردی اور نسل پرستی کے عالمی خطرے سے لڑنے کے لئے سبھی اقدامات کئے جانے چاہئے ۔ انہوں نے کہاکہ ‘‘حال ہی میں، میں نے دہشت گردی کے مختلف پہلوؤں پر بحث کے لئے ایک عالمی کانفرنس پر زور دیا ہے ۔ دہشت گردی کے خطرے کے خلاف جنگ دنیا کی اولین ترجیحات میں سے ایک بن جانی چاہئے ۔ میں اس پر برازیل کے کردار کی تعریف کرتا ہوں’’۔
شنگھائی تعاون تنظیم کے سربراہی اجلاس کے لئے کرغیزستان اور مالدیپ نیز سری لنکا کے اپنی حالیہ دوروں کے دوران، مسٹر مودی نے دہشت گردی سے لڑنے کی پرزور وکالت کی تھی۔ ساتھ ہی انہوں نے دہشت گردی کے خلاف ایک عالمی کانفرنس کے انعقاد کا مشورہ دیا تھا۔