واشنگٹن،24 مئی (اسپوتنک) ناٹوکے سکرٹری جنرل جینس اسٹولٹن برگ اور افغانستان میں مفاہمت کیلئے امریکہ کے خصوصی نمائندے زلمے خلیل زاد نے افغانستان میں تین دن کی جنگ بندی کا خیر مقدم کرتے ہوئے کہا کہ اس سے امن کی راہ نکلنی چاہئے ۔مسٹر اسٹولٹن برگ نے کہاکہ عید کے موقع پر تین دن کی جنگ بندی پرافغانستان حکومت اور طالبان کے بیانات کا میں خیر مقدم کرتا ہوں۔ تمام فریقوں کو امن کیلئے موقع کا فائدہ اٹھانا چاہئے ۔ ناٹو افغانستان کی طویل مدتی سلامتی کیلئے مصروف ہے۔ امریکہ کے نمائندے خیل زاد نے کہا کہ امن کیلئے اس موقع کو نہیں گنوانا چاہئے . امریکہ اس میں مدد کرے گا۔مسٹر خلیل زاد نے اپنے ٹویٹ میں کہا کہ دیگر مثبت اقدامات پر فوری طور پر عمل کرنا چاہئے ، مثلا دونوں پارٹیوں کی جانب سے امریکہ طالبان کے معاہدے کے تناظر میں باقی قیدیوں کی رہائی، تشدد میں کمی لانا، اور بین افغان مذاکرات کے آغاز کیلئے نئی تاریخ رکھنی چاہئے . انہوں نے کہا کہ یہ قدم امن عمل میں تیزی لانے کا موقع فراہم کرتا ہے۔قابل ذکر ہے کہ دہشت گرد تنظیم طالبان نے ہفتہ کو عید الفطر کے موقع پر افغانستان میں تین دن کی جنگ بندی کا اعلان کیا ہے ۔ افغانستان کے صدر اشرف غنی نے کہا کہ حکومت امن کی پیشکش میں توسیع کر رہی ہے اور انہوں نے افغان قومی دفاع سیکورٹی فورسزکو اتوار کو مؤثر ہونے والے اس جنگ بندی پر عمل کرنے کا حکم دیا ہے ۔
