او آئی سی وزرائے خارجہ کونسل کے غیر معمولی اجلاس میں اہم فیصلہ
اسلام آباد: وزیر خارجہ پاکستان شاہ محمود قریشی نے کہا ہیکہ افغانستان کے معاملے پر او آئی سی وزارئے خارجہ کا غیر معمولی اجلاس بہت بڑی پیشرفت ہے اور ہم افغانستان کے لیے ٹرسٹ فنڈ کے قیام میں کامیاب ہوگئے ہیں۔او آئی سی وزرائے خارجہ کونسل کے غیر معمولی اجلاس سے متعلق بیان میں شاہ محمود قریشی نے کہا کہ اللہ نے پاکستان کو عزت اور کامیابی عطا فرمائی، وزیراعظم عمران خان کی قیادت میںپاکستان کو یہ کامیابی حاصل ہوئی ہے، 20 وزرائے خارجہ اور 10 نائب وزرائے خارجہ کی اجلاس میں شرکت پاکستان کے لیے بڑی کامیابی ہے، 437 وفود پاکستان میں منعقدہ اس تاریخی اجلاس میں شریک ہوئے۔ شاہ محمود قریشی نے کہا کہ ان حالات میں اگرافغانستان کی مدد نہ کی گئی تو صورتحال مزید خراب ہو سکتی ہے۔انہوں نے کہا کہ افغانستان کے لیے ٹرسٹ فنڈ کے قیام میں کامیابی اجلاس کا اہم فیصلہ ہے جبکہ افغانستان کے بینکنگ سسٹم کی بحالی سے متعلق قراردادبھی بہت بڑی پیش رفت ہے، پاکستان اور سعودی عرب نے مل کر اس میں اہم کردار ادا کیا ہے۔شاہ محمود کا کہنا تھا کہ مسئلہ طالبان کا نہیں بلکہ 38 ملین افغان عوام کا ہے، افغان عوام بھوک اور قحط کا سامنا کر رہے ہیں، افغانستان کو ادویات اورخوراک کی فوری ضرورت ہے، تنخواہ دینے کے پیسے ہوں گے تو اسکول بھی چلیں گے۔انہوں نے مزید کہا کہ عوام کے نکتہ نظرسے امریکہ کو اپنے فیصلے پر نظرثانی کرنی چاہیے۔