کابل میںبند سفارتخانہ کھولنے اور طالبان سفیر کو نئی دہلی میں ذمہ اری کی اجازت کا بھی مطالبہ
کا بل: افغان طالبان کے سابق امیر ملا عمر کے صاحبزادے اور امارت اسلامی افغانستان کے وزیر دفاع ملا یعقوب نے افغان فوجیوں کو تربیت کے لیے ہندوستان بھیجنے پر آمادگی ظاہر کی ہے۔ ایک ہندوستانی چینل کو دیے گئے انٹرویو میں ان سے سوال کیا گیا کہ کیا وہ افغان فوجیوں کو تربیت کے لیے ہندوستان بھیجنے پر آمادہ ہیں؟ جس پر انھوں نے کہا کہ ہمیں افغان فورسز کو تربیت کے لیے ہندوستان بھیجنے میں کوئی مسئلہ نہیں ہے، اس سے دونوں ممالک کے درمیان تعلقات مضبوط ہوں گے اور ہم اس کی بنیاد رکھیں گے۔ ہندوستان سے سفارتی تعلقات سے متعلق کیے جانے والے سوال پر ملا یعقوب کا کہنا تھا کہ افغانستان ہندوستان سمیت تمام ممالک سے مضبوط سفارتی تعلقات رکھنے کا خواہشمند ہے، ہمارے جب تمام ممالک سے سیاسی اور سفارتی تعلقات مضبوط ہوں گے ہم تب ہی دفاعی تعلقات کے لیے تیار ہو سکیں گے، ہمیں اس میں کوئی مسئلہ نظر نہیں آتا۔ افغان وزیر دفاع نے دوران گفتگو ہندوستان سے کابل میں اپنا بند سفارت خانہ دوبارہ کھولنے کی درخواست کرنے کے ساتھ طالبان سفیر کو نئی دہلی میں افغان سفارت خانہ سنبھالنے کی اجازت دینے کا بھی مطالبہ کیا۔ انھوں نے مزید کہا کہ اگر ہندوستان اپنے سفارتی عملے کو افغانستان بھیجتا ہے تو طالبان کسی بھی قسم کی حفاظتی ضمانت دینے کے لیے تیار ہیں۔ یاد رہے کہ افغانستان سے امریکی انخلا اور طالبان کے حکومت میں آنے کے بعد پہلی بار ہندوستانی وفد طالبان حکومت سے ملاقات کے لیے افغانستان پہنچا ہے۔