واشنگٹن : ہندوستان کی نریندرمودی سرکار کی جانب سے مذہبی اقلیتوں کو نشانہ بنانے کے واقعات پر امریکی مذہبی آزادی پینل نے بائیڈن انتظامیہ سے ہندوستان کو تشویشناک ملک قرار دینے کا مطالبہ کر دیا۔امریکی مذہبی پینل کا کہنا ہے کہ ہندوستان بیرون ملک سرگرم کارکنوں، صحافیوں اور وکلاء کو خاموش کرنے کی کوشش کر رہا ہے، ہندوستانی حکومت کی حالیہ کوششوں سے مذہبی آزادی کو شدید خطرہ لاحق ہے۔امریکی رپورٹ میں کہا گیا ہے کہ مودی سرکار کے بیرون ملک مقیم اقلیتوں کو نشانہ بنانے والے دھمکی آمیز حربے نظر انداز نہیں کیے جا سکتے۔رپورٹ میں کہا گیا ہے کہ کینیڈا میں ہردیپ سنگھ نجر کا قتل انتہائی پریشان کن ہے جبکہ امریکہ میں خالصتان تحریک کے سرگرم رہنما گروپتونت سنگھ کے قتل کی ہندوستانی سازش انتہائی پریشان کن ہے۔امریکی مذہبی پینل نے جو بائیڈن سے مطالبہ کیا کہ اقلیتوں کو نشانہ بنانے پر ہندوستان کو تشویشناک ملک قرار دیا جائے۔یاد رہے کہ اس سے قبل امریکی حکام بھی ہندوستان سے گرپتونت سنگھ کے قتل کی سازش میں تعاون کا مطالبہ کر چکے ہیں جبکہ کینیڈین وزیراعظم جسٹن ٹروڈو نے بھی مودی سرکار سے کہا تھا کہ ہندوستانی حکومت ہردیپ سنگھ نجر کے قتل میں ملوث ہندوستانی اہلکاروں کے خلاف کارروائی کرے۔
