حیدرآباد ۔ 12۔جون (سیاست نیوز) محکمہ اقلیتی بہبود نے تلنگانہ اسٹیٹ میناریٹیز اسٹڈی سرکل کی جانب سے تلنگانہ پبلک سرویس کمیشن گروپ I پلیمینری اگزامس کی مفت کوچنگ کے انعقاد کا فیصلہ کیا ہے ۔ اس سلسلہ میں اہل امیدواروں سے درخواستیں طلب کی گئیں۔ ڈائرکٹر اسٹڈی سرکل بی شفیع اللہ نے بتایا کہ 14 جون سے اہل امیدوار درخواستیں داخل کرسکتے ہیں اور 5 جولائی درخواستوں کے ادخال کی آخری تاریخ رہے گی ۔ کوچنگ کلاسس کا 8 جولائی سے آغاز ہوگا ۔ اہل امیدواروں کا گریجویشن کامیاب ہونا ضروری ہے۔ درخواست فارم کے ساتھ ڈگری ، انٹرمیڈیٹ سرٹیفکٹ کے علاوہ ایس ایس سی میمو ، آدھار کارڈ کی کاپی اور دو پاسپورٹ سائز فوٹوز داخل کی جائیں۔ تلنگانہ میناریٹیز اسٹڈی سرکل تھرڈ فلور جامعہ نظامیہ کامپلکس ، گن فاؤنڈری پر درخواستیں داخل کی جاسکتی ہیں۔ خواہشمند امیدواروں سے کہا گیا ہے کہ وہ اس موقع سے استفادہ کریں۔
