نیویارک: اقوام متحدہ کی سیکورٹی کونسل نے باجوڑ دھماکے کی شدید مذمت کی ہے۔ اقوام متحدہ کی سیکورٹی کونسل کی جانب سے جاری بیان میںباجوڑ دھماکے میں حکومت پاکستان اور جاں بحق افراد کے اہل خانہ سے اظہارتعزیت کیا گیا۔ ہرقسم اور شکل کی دہشت گردی عالمی امن کیلئے سنگین خطرہ ہے۔ سیکوریٹی کونسل نے تمام متعلقہ ممالک سے باجوڑ واقعہ کے مجرمین کے خلاف فیصلہ کن کارروائی کرنے پر زور دیتے ہوئے کہا کہ واقعہ میں ملوث تمام کرداروں، مالی معاونوں اور سہولت کاروں کو جلد از جلد انصاف کے کٹہرے میں کھڑا کرنا چاہیے۔ اقوام متحدہ کی سیکورٹی کونسل نے کہا کہ تمام متعلقہ ممالک بین الاقوامی قوانین اور سلامتی کونسل کی قراردادوں کے تحت اپنی ذمہ داریوں کے مطابق مجرمین کو کیفرِ کردار تک پہنچانے میں حکومت پاکستان کیساتھ تعاون کریں۔
