محرم اور یوم عاشورہ کے پیش نظر وقف بورڈ کی خصوصی توجہ
حیدرآباد۔17جولائی (سیاست نیوز) ملک بھر میں ماہ محرم اور یوم عاشورہ کا شہر حیدرآباد میں بصد عقیدت و احترام انعقاد عمل میں لایا جاتا ہے اور ماہ محرم الحرام کی آمد سے قبل ہی دونوں شہروں حیدرآبادو سکندرآباد کے عاشور خانوں‘ عزاء خانوں کے علاوہ ان مقامات پر تیاریاں تیزی سے شروع کردی جاتی ہیں جہاں ایام عزاء کے دوران مجالس عزاء اور ماتم کا اہتمام کیا جاتا ہے۔ شہر حیدرآباد کے تاریخی الاوہ بی بی میں آہک پاشی کے تمام کاموں کو مکمل کرلیا گیا ہے اور لمحہ ٔ آخر کی تیاریاں تیزی سے جاری ہیں۔یکم محرم الحرام کا چاند نظر آتے ہی الاوہ بی بی کے علاوہ دیگر عاشور خانوں و بارگاہوں میں علم ایستادہ کردیئے جاتے ہیں اور عقیدت مندوں کی جانب سے زیارات علم مبارک اور ڈھٹی پیش کرنے کے علاوہ مجالس عزاء کا اہتمام شروع کردیا جاتا ہے۔ تلنگانہ ریاستی وقف بورڈ کی جانب سے حسب سابق جاریہ سال بھی عاشور خانوں کے لئے جاری کی جانے والی رقومات کی اجرائی کے علاوہ آہک پاشی کے کاموں کے علاوہ مختلف محکمہ جات کے ذریعہ درکار کاموں کو مکمل کروایا جاچکا ہے۔ جناب محمد مسیح اللہ خان صدرنشین تلنگانہ ریاستی وقف بورڈ اور جناب سید خواجہ معین الدین چیف اکزیکیٹیو آفیسر نے بتایا کہ ماہ محرم الحرام بالخصوص ابتدائی دس ایام اور یوم عاشورہ کے لئے عاشور خانوں کے علاوہ بی بی کا علم گذرنے کے راستوں پر تلنگانہ ریاستی وقف بورڈ کی نگرانی میں مختلف محکمہ جات کے ذریعہ روشنیوں ‘ صفائی کے علاوہ دیگر کاموں کو کروایا جائے گا اور اس کی بورڈ کی جانب سے خصوصی نگرانی کی جائے گی۔صدرنشین تلنگانہ ریاستی وقف بورڈ نے عہدیدارو ںکو تمام عاشور خانوں کے قریب خصوصی صفائی کے انتظامات کے علاوہ روشنیوں کے انتظامات کو یقینی بنانے کی ہدایات جاری کرتے ہوئے کہا کہ اس سلسلہ میں مجلس بلدیہ عظیم ترحیدرآباد بالخصوص ساؤتھ زون میں عہدیدارو ںکو متحرک رہنے کی ہدایات جاری کی ہیں۔ جناب محمد مسیح اللہ خان نے بتایا کہ شہر حیدرآباد میں ایام عزاء کا اہتمام تاریخی اہمیت کا حامل ہے اور یوم عاشورہ اور اس سے قبل ملک بھر کے کئی علاقوں سے سوگواران اہلبیت شہدائے کربلاء سے عقیدت رکھنے والے بڑی تعداد میں محض زیارت کے مقصد سے حیدرآباد آتے ہیں۔م
