قاہرہ ؍ انقرہ : مصری صدر عبدالفتاح السیسی اور ان کے ترک ہم منصب رجب طیب اردغان نے فوری طور پر سفارتی تعلقات کو اپ گریڈ کرنے اور سفیروں کے تبادلے شروع کرنے کا فیصلہ کیا ہے۔مصری ایوان صدر کے ترجمان نے ایک بیان میں کہا کہ السیسی اور اردغان نے ایک فون کال کے دوران اس بات کی تصدیق کی کہ دونوں ملکوں اور مصری اور ترک عوام کے درمیان تاریخی گہرے تعلقات ہیں۔ دونوں نے تعلقات کے رشتوں کو مزید مضبوط بنانے اور باہمی تعاون کو بڑھانے پر اتفاق کیا ہے۔السیسی نے صدارتی انتخابات میں فتح اور نئی صدارتی مدت کیلئے ترکیہ کے صدر کے طور پر دوبارہ منتخب ہونے پر اردغان کو فون کے دوران مبارکباد دی۔ واضح رہے 13 اپریل کو مصر کے وزیر خارجہ سامح شکری نے اپنے ترک ہم منصب مولود چاوش اوغلو کی دعوت پر ترکی کے دارالحکومت انقرہ کا دورہ کیا تھا۔یہ دورہ بات چیت کے اس تسلسل کے طور پر سامنے آیا تھا جو گزشتہ مارچ میں ترک وزیر خارجہ کے دورہ قاہرہ کے دوران ہوئی تھیں۔ قاہرہ اور انقرہ کے درمیان ہونے والی بات چیت کا مرکز دونوں ملکوں کے درمیان دو طرفہ تعلقات کو بڑھانے کے طریقوں پر تھا۔ چاوش اوغلو نے سفارتی تعلقات منقطع کرنے کے 10 سال بعد گزشتہ ماہ قاہرہ کا دورہ کیا تھا۔
