بیروت : اسرائیلی قابض فوج نے لبنان میں اسلامی مزاحمتی تحریک ’’حماس‘‘ کے عسکری ونگ القسام بریگیڈ کے کمانڈر کو جمعرات کو ایک گاڑی پر حملے کرکے شہید کردیا ۔ انہیں لبنان کی وادی بقاع میں ایک بزدلانہ حملے میں نشانہ بنایا گیا ۔ القسام بریگیڈز نے ایک بیان میں کہا ہے کہ وہ مجاہد اور القسام کے کمانڈر محمد احمد جبارہ ’’ابو محمود‘‘ کی شہادت پر انہیں خراج عقیدت پیش کرتے ہیں اور ان کی شہادت کی قبولیت کیلئے دعاء گو ہیں ۔ جبارہ کی شہادت فلسطینی عوام کی طرف سے مسجد اقصیٰ القدس اور پورے فلسطین کی آزادی کیلئے دی گئی قابل فخر قربانیوں اور اسرائیلی مجرم ریاست کے جنگی جرائم کے سلسلہ کی ایک کڑی ہے ۔ انہوں نے مزید کہا کہ وہ جمعرات کی صبح طوفان الاقصیٰ کی جنگ میں شہید ہونے والوں میں شامل تھے ۔ انہیں غدار صیہونی طیاروں نے لبنان کے مغربی علاقے بقاع میں ایک بزدلانہ حملہ میں شہید کردیا۔ بیان میں کہا گیا کہ ہمارے بہادر شہید کا خون رائیگاں نہیں جائے گا ۔ ہم اللہ سے عہد کرتے ہیں ہم اپنے لوگوں اور اپنی قوم سے عہد کرتے ہیں کہ وہ مزاحمت کا راستہ جاری رکھیں گے ۔
