انسانی تاریخ کے گرم ترین سال کا اختتام‘ نئی امنگوں کیساتھ نئے سال کا استقبال
ملبورن : انسانی تاریخ کا گرم ترین سال 2023 اپنے اختتام کو پہنچا اور آٹھ ارب کی آبادی نے نئی امنگوں اور امیدوں کے ساتھ نئے سال میں قدم رکھا ہے۔میڈیا کے مطابق سال 2023 پر نظر دوڑائی جائے تو ان بارہ ماہ میں چیٹ بوٹس جیسی ٹیکنالوجی سامنے آئی، ماحولیاتی بحرانوں کا سامنا رہا اور یوکرین اور غزہ میں جنگ کی شدت بڑھتی ہوئی دکھائی دی۔ آسٹریلیا کے شہر سڈنی جسے ’دنیا کا نیو ایئر دارالحکومت‘ کہا جاتا ہے، وہاں سالِ نو کے آغاز پر لاکھوں کی تعداد میں شہریوں نے ہنستے مسکراتے سال 2024 کا استقبال کیا۔شہر بھر میں تقریبات کا اہتمام کیا گیا اور آسمان روشنیوں سے جگمگا اٹھا۔ جبکہ آتش بازی کیلئے استعمال ہونے والے سامان کا حجم آٹھ ٹن بتایا گیا ہے۔سال 2024 میں دنیا کی نصف آبادی انتخابات میں مصروف ہوگی جبکہ دوسری جانب اولمپکس گیمز کیلئے پیرس میں میدان سجے گا جو چار سال بعد منعقد ہونے جا رہی ہیں۔اسی سال انڈیا نے آبادی کے حساب سے چین کو پیچھے چھوڑا اور چاند کے جنوبی قطب پر پہنچنے والا پہلا ملک بن گیا۔1880 کے بعد سے جب سے درجہ حرارت کا ریکارڈ رکھا جا رہا ہے، سال 2023 گرم ترین سال قرار دیا گیا۔ اسی دوران ماحولیاتی تبدیلیوں کے باعث آسٹریلیا سے افریقہ اور ایمازون تک تباہی بھی دیکھنے کو ملی۔