بہار اسمبلی انتخابات میںشفافیت اور ووٹروں کے احترام پر زور
پٹنہ۔4؍اکتوبر( ایجنسیز)آئندہ بہار اسمبلی انتخابات کو شفاف اور غیر جانبدارانہ بنانے کیلئے ہفتہ کو چیف الیکشن کمشنر گیانیش کمار کی سربراہی میں بہار کی 12 تسلیم شدہ سیاسی جماعتوں کے ساتھ ایک اہم میٹنگ منعقد ہوئی جس میں انتخابی عمل، ووٹروں کی سہولت اور شفافیت پر تفصیلی تبادلہ خیال کیا گیا۔ اس میٹنگ میں الیکشن کمشنر سکھبیر سنگھ سندھو اور وویک جوشی کے ساتھ بہار کے چیف الیکٹورل آفیسر ونود گنجیال اور کمیشن کے دیگر سینئر افسران بھی موجود تھے۔اجلاس میں کمیشن نے واضح کیا کہ سیاسی جماعتیں جمہوری نظام کی بنیاد ہیں، اس لیے انتخابات کے ہر مرحلے میں ان کی ذمہ داری بنتی ہے کہ وہ شفافیت اور غیر جانبداری کو یقینی بنائیں۔ انہوں نے اپیل کی کہ وہ ووٹروں کے احترام کو سب سے مقدم رکھیں ۔میٹنگ میں شریک 12 سیاسی جماعتوں میں کانگریس، بی جے پی، جے ڈی یو، آر جے ڈی، عام آدمی پارٹی، بی ایس پی، سی پی آئی ایم، این پی پی، سی پی آئی ایم ایل، ایل جے پی (رام ولاس)، آر ایل جے پی اور آر ایل جے پی (ایک دھڑا) شامل تھے۔ ان سبھی جماعتوں نے انتخابات کو شفاف بنانے کیلئے کمیشن کی کوششوں کی تعریف کی اور اس پر مکمل اعتماد کا اظہار کیا۔کچھ نے کمیشن ووٹر لسٹ کو صاف و شفاف بنانے کے اقدامات پر شکریہ ادا کیا۔ ووٹنگ مراکز پر ووٹروں کی زیادہ سے زیادہ تعداد 1,200 مقرر کرنے پر زور دیا گیا۔ جماعتوں نے یہ تجویز بھی دی کہ بہار میں انتخابات چھٹ پوجا کے فوراً بعد منعقد کیے جائیں تاکہ عوام زیادہ تعداد میں حصہ لے سکیںجبکہ انتخابات کو کم سے کم مراحل میں مکمل کیا جائے تاکہ ووٹروں پر غیر ضروری بوجھ نہ پڑے۔میٹنگ کے دوران کمیشن کے حالیہ اقدامات پر بھی گفتگو ہوئی جبکہ بعض تجاویز پر غور کیا گیا۔ خاص طور پر پوسٹل ووٹوں کی گنتی اور فارم 17سی سے متعلق نئے انتظامات کی سیاسی جماعتوں نے بھرپور تعریف کی۔اجلاس کے اختتام پر تمام جماعتوں نے الیکشن کمیشن پر اپنے اعتماد کو دہراتے ہوئے کہا کہ آزاد، غیر جانبدار اور شفاف انتخابات کے لیے وہ مکمل طور پر کمیشن کے ساتھ کھڑے ہیں۔ انہوں نے عوام سے اپیل کی کہ وہ جمہوری عمل میں بڑھ چڑھ کر حصہ لیں تاکہ بہار کے مستقبل کیلئے بہتر فیصلہ سامنے آ سکے۔