ابوظہبی : متحدہ عرب امارات کے قومی مرکز برائے موسمیات نے کہا ہے کہ ملک بھر میں آئندہ روز جمعرات اور جمعہ کو تیز بارش کا امکان ہے جس کے بعد تمام سرکاری و نجی سکول بند رکھنے کی ہدایات جاری کی گئی ہیں۔وزارت تعلیم نے کہا ہے کہ موسلادھار بارش کے امکان اور غیر یقینی موسم کے باعث یہ فیصلہ کیا گیا ہے۔ہنگامی حالات سے نمٹنے والی کمیٹی کا کہنا ہے کہ ’تمام سکولوں میں آن لائن تدریس ہوگی، تمام پارک اور پبلک مقامات بند ہوں گے اور تمام ایونٹ معطل کیے جائیں گے۔‘’محکمہ موسمیات کی اطلاع کے مطابق گو کہ بارش کی حالیہ لہر پچھلی لہر سے کم ہوگی تاہم احتیاطی تدابیر کے طور پر رہائشیوں کو گھروں تک محدود رہنے کی ہدایت کی گئی ہے۔‘الامارات الیوم کے مطابق بحیرہ احمر سے آنے والے بادلوں سے ملک کے مختلف علاقے ہفتہ تک متاثر رہیں گے۔قومی مرکز برائے موسمیات نے رہائشیوں کو اطمینان دلایا ہے کہ بارش کی حالیہ لہر سابقہ غیر معمولی لہر سے کم ہوگی جبکہ بارش کی مقدار بھی معمول کے مطابق رہے گی۔’غیر متوقع ہنگامی حالت سے نمٹنے کے لیے تمام امدادی اداروں کو الرٹ کر دیا گیا ہے۔‘مرکز کا کہنا ہے کہ ’جمعرات کو ساڑھے 12 بجے دوپہر سے رات 8 بجے تک تیز ہوائیں چلیں گی جن کی رفتار 40 کلو میٹر فی گھنٹہ ہوگی۔‘ملک کے بیشتر علاقوں میں گرج چمک کے ساتھ بارش کی پیش گوئی کی گئی ہے جبکہ بعض علاقوں میں اولے پڑنے کا بھی امکان ہے۔دبئی میں ہنگامی حالات سے نمٹنے والی کمیٹی نے شیخ منصور بن محمد بن راشد آل مکتوم کی سربراہی میں غیر معمولی اجلاس کا انعقاد کیا۔کمیٹی نے غیر یقینی موسم کے لیے تیاریوں کا جائزہ لیا۔
