دبئی۔۔21 اپریل (سیاست ڈاٹ کام)متحدہ عرب امارات میں کورونا وائرس کے 484 نئے معاملات سامنے آئے ہیں جس کے بعد متاثرین کی تعداد بڑھ کر سات ہزار 625 ہوگئی ہے۔اماراتی وزارت صحت کے مطابق مزید 74 افرد صحت یاب ہوئے۔ اب تک ایک ہزار 360 افراد صحت یاب ہو چکے جبکہ کوروناوائرس سے مزید دو اموات ہوئی ہیں۔ مرنے والے دونوں ایشیائی تھے۔ امارات میں کورونا سے مرنے والوں کی تعداد 43 ہو گئی۔ترجمان نے کہا ہے کہ گزشتہ روزسامنے آنے والے نئے معاملے پچھلے چوبیس گھنٹوں میں کیے جانے والے کورونا ٹسٹوں کے بعد سامنے آئے ہیں۔خاتون ترجمان ڈاکٹر فریدہ الحسنی نے کہا کہ امارات میں کورونا کے متاثرین کی تعداد میں اضافے کی وجہ یہ ہے کہ بڑے پیمانے پرکورونا ٹسٹ کیے جا رہے ہیں تاکہ متاثرہ افراد کو الگ کرکے ان کا علاج کیا جا سکے۔دریں اثنا سعودی خبر رساں ایجنسی واس کے مطابق اردن میں پیر کو کورونا کا کوئی نیا مریض سامنے نہیں آیا تاہم مشرقی سرحد پر آٹھ ٹرک ڈرائیوروں کے ٹسٹ مثبت آئے ہیں۔اردن کے وزیر صحت سعد جابر نے کہا کہ اردن میں کورونا کے مریضوں کی تعداد 425 ہوگئی ہے جس میں 136 افراد اس مرض میں ہنوز مبتلا ہیں۔