ابوظہبی، 28 نومبر (یو این آئی) متحدہ عرب امارات کے حکام کی جانب سے 54 ویں قومی دن (عید الاتحاد) کے موقع پر سیکڑوں قیدیوں کی رہائی کا اعلان کردیا گیا ہے ۔ غیر ملکی ذرائع ابلاغ کے مطابق متحدہ عرب امارات کے صدر شیخ محمد بن زاید آل نہیان نے اصلاحی اداروں سے دو ہزار937 قیدیوں کی رہائی کا حکم جاری کردیا ہے ۔ رپورٹس کے مطابق اماراتی صدر نے ان قیدیوں پرعائد مالی جرمانے بھی ادا کرنے کی ہدایت دی ہے ، جو ان کی سزاؤں کا حصہ تھے ۔ دبئی کے حکمران، نائب صدر اور وزیراعظم شیخ محمد بن راشد المکتوم کی جانب سے بھی مختلف قومیتوں کے دو ہزار 25 قیدیوں کو رہا کرنے کا حکم جاری کیا گیا ہے ۔ رپورٹس کے مطابق دبئی پبلک پراسیکیوشن نے دبئی پولیس کے ساتھ مل کر مختلف جرائم میں گرفتار افراد کی رہائی کیلیے قانونی طریقہ کار پر عملدرآمد شروع کردیا۔ ریاست عجمان میں 225، ریاست فجیرہ میں 129، شارجہ میں 366 قیدیوں اور راس الخیمہ میں 854 قیدیوں کی رہائی کا حکم جاری کیا گیا ہے ۔ واضح رہے کہ جن قیدیوں کی سزا معاف کی گئی ان کا تعلق مختلف قومیتوں سے ہے ، اچھے اخلاق اور اہلیت کے معیار کے مطابق کے بعد ان کا انتخاب کیا گیا۔ یہ سنگین جرائم میں ملوث نہیں اور اپنی سزا کا ایک حصہ پورا کرچکے ہیں۔
