دبئی ۔17 اکٹوبر (سیاست ڈاٹ کام ) انٹرنیشنل کرکٹ کونسل نے اینٹی کرپشن کوڈ کے تحت فرد جرم عائد کرتے ہوئے یو اے ای کرکٹ ٹیم کے کپتان محمد نوید سمیت تین کرکٹرز کو معطل کردیا ہے۔ یو اے ای میں ورلڈ ٹی ٹوئنٹی کوالیفائرز کے آغاز سے دو روز قبل میزبان ٹیم کو بڑا جھٹکا اس وقت لگا جب آئی سی سی نے اس کے تین کھلاڑیوں کپتان محمد نوید، بیٹسمین شیمن انور بٹ اور فاسٹ بولر قدیر خان کو اینٹی کرپشن قوانین کے تحت معطل کردیا، تینوں کرکٹرز پر مشترکہ طور پر 13 چارجز عائد کئے گئے ہیں ۔ آئی سی سی کے مطابق کپتان محمد نوید پر دو دن بعد ہونیوالے ورلڈ ٹی ٹوئنٹی کوالیفائرز اور اس سال ہونے والی ٹی ٹین لیگ میں ممکنہ میچ فکسنگ کی پیشکش قبول کرنے کے الزامات ہیں اور ان پر کرپشن کی پیشکش کی اطلاع نہ دینے سے متعلق آئی سی سی قانون کی خلاف ورزی پر بھی فرد جرم عائد کی گئی ہے۔ بیٹسمین شیمن انور پر بھی ورلڈ ٹی ٹوئنٹی کوالیفائرز کے دوران مشتبہ سرگرمیوں میں شامل ہونے کی رضامندی ظاہر کرنے اور اس کی پیشکش سے آئی سی سی کو آگاہ نہ کرنے کے الزام میں فرد جرم عائد کی گئی ہے۔ فاسٹ بولر قدیر خان پر اس سال اپریل میں متحدہ عرب امارات کی زمبابوے کیخلاف سیریز اور اگست میں نیدرلینڈز کیخلاف سیریز میں بدعنوان سرگرمیوں کے لیے روابط سے آئی سی سی کو آگاہ نہ کرنے اور اگست میں ہی مہر چیاکر نامی کرکٹر کو ٹیم کے حوالے سے معلومات دینے پر الزامات عاید کئے گئے ہیں ۔ مہر چیاکر یو اے ای کے مقامی کرکٹر ہیں اور انہوں نے اجمان میں ایک ٹورنمنٹ بھی کھیلا تھا۔ ان پر بھی آئی سی سی سے تحقیقات میں تعاون نہ کرنے پر فرد جر م عائد کردی گئی ہے۔ محمد نوید، قدیر احمد خان اور شیمن انور بٹ آئی سی سی کوالیفائرزکیلئے یو اے ای کے عبوری اسکواڈ میں شامل تھے۔ یو اے ای نے محمد نوید کی جگہ احمد رضا کو ٹیم کا کپتان مقرر کیا تھا۔ اس موقع پر امارتی بورڈ نے نوید کو ہٹائے جانے کی کوئی وجہ نہیں بتائی تھی۔
