راہول گاندھی کا مودی کو چیالنج ‘جئے رام رمیش کے 3 تلخ سوالات
نئی دہلی :وزیر اعظم نریندر مودی ایک انتخابی تشہیر کے دوران امبانی۔اڈانی‘ سے متعلق بیان دے کر بری طرح پھنستے ہوئے دکھائی دے رہے ہیں۔ وہ امبانی۔اڈانی کو لیکر راہول گاندھی سے جواب مانگ رہے تھے لیکن وہ خود ہی کٹہرے میں کھڑے میں آگئے ہیں۔ راہول گاندھی نے پی ایم مودی کے بیان پر انھیں مخاطب کرتے ہوئے ایک ویڈیو پیغام جاری کیا ہے اور پوچھا کہ ’’مودی جی، تھوڑا سا گھبرا گئے کیا؟ اب تک بند کمروں میں ان کا (امبانی۔اڈانی) نام لیتے تھے، پہلی بار عوام کے درمیان ان کا نام لیا۔راہول گاندھی نے ویڈیو میں مودی کے ’ٹیمپو‘ والے بیان کا بھی تذکرہ کیا اور کہا کہ آپ کو یہ بھی معلوم ہے کہ یہ ٹیمپو میں پیسے دیتے ہیں۔ کیا یہ آپ کا ذاتی تجربہ ہے۔ پھر راہول گاندھی نے مودی کو چیلنج کیا کہ جب آپ کو اتنا سب کچھ معلوم ہے تو پھر ان کے یہاں ای ڈی اور سی بی آئی بھیج کر جانچ کروا لیجیے۔ پوری جانکاری نکلوائیے، جلد از جلد کروائیے۔ گھبرائیے مت مودی جی۔وزیر اعظم مودی نے تلنگانہ میں ایک جلسۂ عام سے خطاب کرتے ہوئے ایسا بیان دے دیا جو موضوع بحث بن چکا ہے اور سوشل میڈیا پر تیزی کے ساتھ وائرل بھی ہو رہا ہے۔ مودی نے کانگریس پر امبانی۔اڈانی سے پیسے لینے کا الزام لگایا اور کہا کہ انتخاب کا اعلان ہوتے ہی امبانی۔اڈانی کو گالی دینا بند کر دیا ہے۔ الیکشن میں امبانی۔اڈانی کا کتنا مال اٹھایا ہے؟ کالے دھن کی کتنی بوریاں ماری ہیں۔ ٹیمپو بھر کر نوٹ پہنچے ہیں۔ وزیر اعظم مودی نے یہ بھی سوال اٹھایا کہ کیا سودا ہوا جو راہول نے امبانی۔اڈانی کو گالی دینا بند کر دیا ہے۔ دال میں ضرور کچھ کالا ہے۔ اس کا جواب راہول گاندھی کو دینا ہوگا۔ اب راہول گاندھی نے اس کا جواب دیتے ہوئے انھیں ہی چیلنج کر دیا ہے۔ راہول گاندھی ہی نہیں، کانگریس صدر کھرگے اور پرینکا گاندھی نے بھی مودی پر ان کے بیان کیلئے سوالیہ نشان لگا دیا ہے۔کانگریس جنرل سکریٹری جئے رام رمیش نے تو امبانی۔اڈانی والے مودی کے بیان پر ان سے تین تلخ سوالات پوچھ لیے ہیں۔ انھوں نے ’ایکس‘ پر یہ تین سوالات ڈالے ہیں اور لکھا ہے کہ ’’آج نریندر مودی نے کہا کہ ان کے متر اڈانی اور امبانی کے پاس ٹیمپو بھر بھر کر کالا دھن ہے۔ ایسے میں تین سوال سامنے آتے ہیں۔ آپ نے کالا دھن نکالنے کے لیے نوٹ بندی کی تھی، تو آپ کے متروں کے پاس کالا دھن کہاں سے آیا؟ جب آپ کے متروں کے پاس بورے بھر بھر کر کالا دھن ہے، تو ای ڈی‘آئی ٹی اورسی بی آئی کوئی کارروائی کیوں نہیں کرتے؟ آخری سوال گزشتہ 10 سال میں نجکاری کر کے سرکاری املاک اڈانی۔امبانی کو ہی فروخت کی گئی ہیں، تو کالا دھن کہاں سے آیا؟ان تین سوالات کے ساتھ اپنے پوسٹ کے آخر میں جئے رام رمیش نے لکھا ہے کہ حقیقت یہ ہے کہ آپ سامنے نظر آ رہی شکست سے بوکھلا گئے ہیں اس لیے اس طرح کی باتیں کر رہے ہیں۔