نئی دہلی، 31 اگست (سیاست ڈاٹ کام) گوگل نے اپنی تحریروں سے لوگوں کے دل و دماغ پر نقش چھوڑنے والی مشہور پنجابی مصنفہ امریتا پریتم کی 100 ویں جینتی پر ان کے اعزاز میں اپنے ہوم پیج پر ان کا خوبصورت ڈوڈل بنایا ہے ۔ امریتا پریتم کی پیدائش غیر منقسم ہندوستان کے پنجاب کے ضلع گوجرانوالہ (اب پاکستان میں) میں 31 اگست 1919 کو ہوئی تھی۔ انہوں نے لاہور میں اپنی تعلیم مکمل کی تھی اور ان کی زندگی کابیشتر وقت وہیں گزرا تھا۔انہیں نوجوانی ہی میں شاعری، کہانی، ناول اور مضامین لکھنے کا بہت شوق تھا۔ جب وہ 16 سال کی تھیں تب ان کی شاعری کا پہلا مجموعہ شائع ہوا تھا۔ ہندوستان وپاکستان تقسیم پر لکھی گئی ان کی شاعری ’آج آنکھن وارث شاہ نو‘ بہت مشہور ہے ۔
