امریکہ، پاکستان میں مختلف اسٹیک ہولڈرز کے ساتھ رابطہ میں

   

واشنگٹن۔ امریکی محکمہ خارجہ کے ترجمان نیڈ پرائیس نے کہاہے کہ امریکہ پاکستان میں مختلف اسٹیک ہولڈرز کے ساتھ رابطے میں ہے اور امریکی حکام پاکستانی حکام کے ساتھ باقاعدگی کے ساتھ مختلف معاملات پر بات چیت کرتے رہتے ہیں، امریکہ پاکستان میں آئینی اور جمہوری اصولوں بشمول حقوق انسانی کی پاسداری کی حمایت کرتا ہے۔ میڈیا رپورٹس کے مطابق وہ چیف آف آرمی اسٹاف کی جانب سے امریکہ کی ڈپٹی وزیر خارجہ وینڈی شرمن کے ساتھ ہونے والی بات چیت کے تناظر میں سوال کا جواب دے رہے تھے۔ تفصیلات میں جائے بغیر انہوں نے کہا کہ معیاری طریقہ کار کے مطابق ہم نجی سفارتی بات چیت کی باریکیوں میں نہیں جاتے۔ انہوں نے کہا کہ امریکا پاکستان میں مختلف اسٹیک ہولڈرز کے ساتھ رابطے میں ہے۔ چند روز قبل سابق وزیراعظم عمران خان کے قریبی ساتھی کی جانب سے اسسٹنٹ وزیر خارجہ ڈونلڈ لو کے ساتھ ہونے والے رابطے کے حوالے سے نیڈ پرائیس کا کہنا تھا کہ اگر ایسی کوئی بات چیت ہوئی ہے تو میں اس پر تبصرہ نہیں کر سکتا۔