بروسیلز/واشنگٹن،19مارچ (سیاست ڈاٹ کام) کورونا وائرس سے نمٹنے میں جدید ترین امریکہ اور یوروپ بری طرح ناکام ہوگئے ہیں، اٹلی، اسپین، فرانس اور برطانیہ میں ایک ہی روز میں 700 اموات ہوئی ہیں جبکہ امریکہ میں ایک ہی روز میں 41 اموات کے بعد مجموعی تعداد 150 ہوگئی۔امریکہ میں 9300 سے زائد افراد بیمار ہیں جن میں امریکی رکن کانگریس ماریوڈیاز بالارٹ بھی شامل ہیں۔ جبکہ بیماروں سے ملاقات کرنے کے سبب ایک درجن سے زائد امریکی اراکین کانگریس قرنطینہ میں چلے گئے ہیں۔متاثرہ شہریوں کی امداد کے لئے امریکی سینیٹ نے غیر معمولی بجٹ منظور کرلیا ہے جبکہ امریکہ -کینیڈا سرحد غیر ضروری سفر کے لئے بند کردی گئی ہے ۔برطانیہ میں حفاظت کے لئے 20 ہزار فوجیوں کو تیار رہنے کا حکم دے دیا گیا، لندن لاک ڈاؤن کرنے کا امکان ہے ، اسکول آج سے بند ہیں۔ این ایچ ایس، پولیس اور اہم ورکرز کے علاوہ سب گھروں سے کام کریں گے جبکہ مساجد کے حکام نے مسلمانوں سے اپیل کی ہے کہ نماز جمعہ گھروں میں پڑھیں۔
