واشنگٹن ؍ تل ابیب : امریکہ اور اسرائیل کی قومی سلامتی سے متعلق سینئر عہدے داران کے درمیان تہران کے حوالے سے تزویراتی بات چیت کا دوسرا دور منگل کے روز منعقد ہو گا۔ ایکسیوس ویب سائٹ کے مطابق یہ بات اسرائیلی ذمہ داران نے بتائی۔بات چیت کا یہ دور ایران میں نطنز کی تنصیب میں دھماکہ کے دو روز بعد ہو رہا ہے۔ کارروائی کا ذمے دار اسرائیل کو ٹھہرایا جا رہا ہے۔ یاد رہے کہ ایک روز بعد ویانا میں بالواسطہ طور پر نیوکلیئر بات چیت کا دوبارہ آغاز ہو گا۔ اس کا مقصد 2015ء میں طے پانے والے ایرانی نیوکلیئر معاہدے میں امریکہ کی دوبارہ واپسی ہے۔تزویراتی مکالمے کی قیادت امریکی قومی سلامتی کے مشیر جیک سولیون اور ان کے اسرائیلی ہم منصب مائر بن شبات کر رہے ہیں۔ بات چیت میں قومی سلامتی اور انٹیلی جنس کی مختلف ایجنسیوں کے ذمے داران بھی شرکت کریں گے۔ بات چیت کا انعقاد وڈیو کانفرنسنگ کے ذریعے ہو گا۔گذشتہ ماہ ہونے والے بات چیت کے پہلے دور میں ایران کے نیوکلیئر پروگرام سے متعلق انٹیلی جنس معلومات پر توجہ مرکوز رکھی گئی تھی۔اسرائیلی ذمہ داران نے توقع ظاہر کی ہے کہ دوسرے دور میں توجہ شام، لبنان، عراق اور یمن میں ایران کی علاقائی سرگرمیوں پر مرکوز ہو گی۔ اس دوران میں ویانا بات چیت کا زیر بحث آنا بھی متوقع ہے۔