واشنگٹن؍ماسکو : روس نے کہا کہ اگر امریکہ اپنے نیوکلیئر ہتھیاروں کی تعداد کو محدود کرنے پر راضی ہو تو وہ بھی ایسا کرنے کیلئے تیار ہے۔ اس پر دونوں میں ایک معاہدہ پہلے سے ہے اور فروری میں اس کے خاتمے سے قبل دونوں اس کی تجدید چاہتے ہیں۔امریکی وزارت خارجہ نے منگل 20 اکتوبر کو ایک بیان میں کہا کہ نیوکلیئر ہتھیاروں کو محدود کرنے پر بات چیت کیلئے وہ روسی حکام سے ملاقات کیلئے تیار ہے تاکہ اس سلسلے میں ایک معاہدے کو حتمی شکل دی جا سکے۔ اس حوالے سے وزارت خارجہ کے ایک ترجمان نے مختصر بیان میں کہا، ”ہمیں امید ہے کہ ایسا کرنے کیلئے روس اپنے کسی سفیر کو مامور کریگا۔”دونوں ملک چاہتے ہیں کہ ان کے درمیان ہتھیاروں کو محدود کرنے کا 2011 کا ‘نیو اسٹریٹیجک آرمز ریڈکشن ٹریٹی’ (نیو اسٹارٹ) کا جو معاہدہ ہے اسے کسی طرح زندہ رکھا جا سکے۔ یہ معاہدہ آئندہ برس فروری میں ختم ہورہا ہے اور ایسا لگتا ہے کہ دونوں ملک اس کی تجدید چاہتے ہیں۔نیو اسٹارٹ معاہدہ نصب کیے جانے والے نیوکلیئر ہتھیاروں، میزائلوں اور بموں کی تعداد کو محدود کرنے سے متعلق ہے۔ نیوکلیئر ہتھیاروں پر کنٹرول کیلئے روس اور امریکہ کے درمیان ‘انٹرمیڈیئٹ رینج نیوکلیئر فورسز ٹریٹی’ بھی تھا تاہم امریکہ نے اسے بچانے کی کوئی کوشش نہیں کی جو گزشتہ برس ختم ہوگیا۔ اب دونوں ملکوں کے درمیان یہی ایک معاہدہ بچا ہے جو فروری میں ختم ہو نے والا ہے اور فریقین نے اس کے خاتمے سے پہلے اس کی تجدید کا ارادہ ظاہر کیا ہے۔امریکہ کی کوشش تھی کہ وہ اس سلسلے میں ایک ایسا معاہدہ کرے جس میں چین کو بھی شامل کیا جاسکے تاہم اس سلسلے میں اس کی تمام کوششیں ناکام ثابت ہوئیں۔ اس ماہ کے اوائل میں ہی روسی صدر ولادمیر پوٹن نے ‘نیو اسٹارٹ’ معاہدے میں ایک برس تک کی توسیع کی تجویز پیش کی تھی۔