واشنگٹن۔6جون( سیاست ڈاٹ کام ) امریکہ میں بفلو پولیس محکمے کے 57 اہلکاروں نے اپنے دو ساتھیوں کی معطلی کے فیصلے کے خلاف احتجاجاََ سپیشل سکواڈ سے استعفے دے دیے ہیں۔بفلو پولیس محکمے کے دو اہلکاروں کو اس لیے معطل کیا گیا تھا کیونکہ انہوں نے احتجاجی مظاہرے میں شریک ایک 75 برس شخص کو زمین پر گرایا، فٹ پاتھ پر سر لگنے سے بزرگ شہری کو شدید زخم آئے۔یہ واقعہ نیاگرا سکوائر میں پیش آیا۔ پولیس اہلکاروں کی جانب سے 75 برس کے بزرگ شہری کو گرانے کی ویڈیو سوشل میڈیا پر وائرل ہوئی اور صارفین نے سخت ردعمل کا اظہار کیا۔واشنگٹن پوسٹ کے مطابق اس واقع کے بعد دو اہلکاروں کو معطل کیا گیا جس پر احتجاج کرتے ہوئے مذکورہ پولیس کی یونٹ کے 57 اہلکاروں نے استعفے دیے۔واضح رہے کہ امریکی ریاست منیسوٹا میں سیاہ فام شہری جارج فلوئیڈ کی حراست میں ہلاکت کے بعد مظاہرین سے نمٹنے کے لیے طاقت کے استعمال پر بھی امریکی پولیس کے کئی اہلکار تنقید کی زد میں ہیں۔ویڈیو میں دیکھا جا سکتا ہے کہ پولیس کے مظالم کے خلاف احتجاجی مظاہرے میں ماسک لگائے ایک عمر رسیدہ شخص پولیس کی جانب بڑھتے ہیں، اور ان سے بات کرتے ہیں لیکن پولیس اہلکار ان کو دھکا دے دیتے ہیں جس سے وہ زمین پر گر جاتے ہیں۔ویڈیو میں دیکھا جا سکتا ہے کہ گرنے ہوئے شہری زخمی ہوئے اور ان کے سر سے خون بہہ رہا ہے۔ اس عمر رسیدہ شخص کو ابتدائی طبی امداد دو ریاستی پولیس اہلکاروں کی جانب سے دی گئی۔75 برس کے شخص عمر رسیدہ شخص کا نام مارٹن گوجینو ہے۔ ان کو ہسپتال پہنچایا گیا۔ ایری کاؤنٹی کے ایگزیکٹو مارک پولون کارز کے مطابق کہ ان کو سر پر شدید چوٹ آئی ہے۔
