واشنگٹن : امریکہ کے صدر جو بائیڈن نے کہا ہے کہ ملک میں بچوں کی اموات کا سب سے بڑا سبب اسلحہ ہے۔صدر بائیڈن نے وائٹ ہاوس میں، گذشتہ سال ٹیکساس کے قصبے یوویلڈی میں ایک پرائمری اسکول پر کئے گئے اور 19 طالبعلموں اور 2 اساتذہ کی ہلاکت کا سبب بننے والے حملے کی سالانہ یاد کے موقع پر ،خطاب کیا۔انہوں نے اپنی اہلیہ جِل بائڈن کے ہمراہ مرحومین کی یاد تازہ کی اور کہا ہے کہ عوام کو غیر مسلح کرنے کے لئے اْٹھائے گئے اقدامات ناکافی ہیں۔انہوں نے کہا ہے کہ AR-15 لانگ بیرل بندوقوں اور نیم خودکار اسلحے کو ممنوع قرار دیا جانا ضروری ہے کیونکہ اس وقت امریکہ میں بچوں کی اموات کا سب سے بڑا سبب اسلحہ ہے۔ جب تک کانگریس اسلحہ مالکان سے متعلق منطقی قوانین پاس نہیں کرتی یہ حملے ختم نہیں ہوں گے۔بائیڈن نے کہا ہے کہ یہ وقت بحیثیت ڈیموکریٹ یا پھر بحیثیت ریپبلکن بات کرنے کا وقت نہیں بلکہ بحیثیت دوست، ہمسایہ، والدین اور امریکی کے قدم اٹھانے اور آواز بلند کرنے کا وقت ہے۔انہوں نے کہا ہے کہ یوویلڈی کے حملے سے لے کر اب تک ملک بھر میں 650 سے زائد اجتماعی مسلح حملوں کے واقعات پیش آ چْکے ہیں۔واضح رہے کہ 24 مئی 2022 کو یوویلڈی کے روب پرائمری اسکول پر حملے میں 18 سالہ سلواڈور راموس نے AR-15 لانگ بیرل بندوق کے ساتھ ایک دوسرے سے متصل دو کمرہ جماعتوں میں داخل ہو کر 19 بچوں اور 2 اساتذہ کو قتل کر دیا تھا۔
